Minister Dowers: E caminda pa yega na gas of petroleo ta largo ainda

Diamars 6 di mei, Minister Interino di Energia, mr. drs. Arthur Dowers, a tene un reunion informativo cu sr. Bill Armstrong, Presidente di Armstrong Oil & Gas Inc., pa haya un update oficial riba e progreso di exploracion actual pa gas y petroleo den awa teritorial di Aruba.

Durante e encuentro, sr. Armstrong a informa cu e empresa a sigui cu e fase di exploracion, despues di investigacion anterior cu a duna indicacion prometedor di gas y petroleo den nos zona maritimo. Minister Dowers a enfatisa cu Gobierno ta sigui e desaroyo aki di cerca, pero tambe cu responsabilidad. Ta bon pa ta optimista, pero mester keda cu dos pia riba tera. E exploracion ta avansando pero tin hopi paso pa tuma prome cu por saca conclusion definitivo.

Minister Dowers tambe a insisti riba e importancia di proteccion di nos medio ambiente. Den e reunion, a confirma cu Armstrong Oil & Gas ta haciendo uzo di un rapport di impacto medio-ambiental cu a traha pa e grupo Repsol, y ta sigui e recomendacionnan pa sigura cu e proyecto ta cana sigur. Sr. Armstrong a garantisa cu nan experiencia cu exploracion den otro partinan di mundo a demostra cu por ehecuta e tipo di operacion aki sin riesgo significante, cu bon planificacion y siguridad optimal.

Como responsable interino di e cartera, Minister Dowers a expresa su preocupacionnan, y a haya contesta satisfactorio riba tur punto treci dilanti. Minister Dowers a enfatisa cu mientras cu exploracion ta andando den otro areanan potencial, Aruba no mester drenta den un euforia exagera. No mester bay den locura di bisti na Sheikh, manera algun hende a haci den pasado. E caminda pa yega na gas of petroleo ta largo ainda.

Ministerio di Energia tin e compromiso pa sigui informa pueblo regularmente riba cualkier desaroyo relevante den e proyecto di exploracion di gas.