ARC Gloria: Embahador di Colombia riba lama

Diadomingo mainta, Prome Minister mr. Mike Eman, Minister mr. Wendrick Cicilia, Minister drs. Rene Herdé, hunto cu Consul di Colombia na Aruba Sr. Gustavo Serrano Amaya y Embahadora di Colombia na Hulanda Sra. Carolina Olarte Bácares, a presencia e yegada magistral di e Buque ARC Gloria.

Prome Minister, hunto cu e capitan naval, Luis Fernando Lara Cogollo, a subi abordo y cu saludo ceremonial di cañon, prome Minister Eman a haci un inspeccion di arma di e personal. Despues, hunto cu e delegacion, a bay den e “Officer’s Wardroom” den cual e capitan a duna un splicacion di nan tarea riba e buque.

ARC Gloria ta un simbolo flotante di orguyo, tradicion y amistad di Colombia pa mundo henter. Cu su bela grandi y figura elegante, e ta un di e botonan mas admira na unda cu e yega. Pero tras di su beyesa tin un proposito: pa train futuro oficialnan naval y pa representa Colombia riba escenario internacional.

Desde su lansamento na 1968, ARC Gloria a nabega pa mas cu 77 pais, parando den casi 200 puerto mundial. Unda cu e bay, e ta hiba un mensahe di pas, disciplina y cultura Colombiano.

E tin dos rol principal:

•           Como boto di entrenamento, e cadetnan naval ta siña habilidadnan practico den navegacion, trabao den grupo y liderazgo.

•           Como embahador maritimo di Colombia, e ta hisa e bandera nacional cu orguyo, cu ta e bandera mas grandi hisa riba un boto di bela!

Gloria ta un tall ship, cu tres mast grandi y mas cu 20 bela. Aunke e tin un motor, regularmente e ta nabega riba poder di biento, mescos cu botonan anticua di siglo pasa.

Cada aña, rond di 70 cadet hoben ta subi riba Gloria pa un biahe largo riba lama. Nan ta siña nabega, mara na waf, maneha emergencia y maneha e boto. E ta un experiencia duro, pero e ta forma caracter fuerte y ta crea recuerdonan pa bida.

E bishita aki ta un simbolo di e relacion fuerte y amistad entre Aruba y Colombia.