Parlamentario Wever-Croes na tur studiante bayendo den exterior pa sigui nan estudio;

“FIHA BO META Y BAY P’E, NO LAGA NINGUN HENDE KITABO NI STROBABO DI LOGRA BO METANAN”

ORANJESTAD – Manera ta conoci Augustus ta e temporada na unda nos hobennan ta preparando pa sigui cu nan estudio den exterior. Parlamentario Evelyn Wever-Croes a expresa cu esaki, apesar cu ta un momento difícil pa e hobennan mes, pa nan mayornan, nan famianan, y amistadnan, tambe ta uno special paso nan ta cuminsando un etapa nobo den nan bida.

“Mi kier a desea cada un di boso hopi exito den e etapa nobo aki. Fiha bo meta bay p’e y no laga nada ni ningun hende kitabo di bo meta.  Ni cuanto reto bo encontra den bo caminda, sigui enfoca riba bo meta. Corda semper tambe cu unda cu bo bay, bo ta un embahador di Aruba. Pues kico cu bo haci, nan lo atribui na Aruba. P’esey semper sea un bon ehempel y un bon embahador.

Na tur e mayornan di e hobennan aki, mi kier a desea hopi forsa, pasobra bida nunca ta prepara nos como mayor pa habri brasa y laga nos yiunan bay. Pero keda semper cu e fe y cu e confiansa cu e fundeshi cu bo a duna bo yiu ta bay ta su guia pa e por logra tur su metanan.

Hopi exito na tur studiante cu ta bayendo den exterior! Parlamentario Wever-Croes a expresa.