Minister di Turismo, Transporte y Labor a yama bonbini na ARC Gloria Colombia na Aruba

Oranjestad- Minister di Turismo, Transporte y Labor, mr. Wendrick Cicilia, a yama cordialmente bonbini na e barco  iconico di entrenamento Colombiano “ARC Gloria” na su yegada na waf di Aruba. E bishita aki ta representa no solamente un momento special pa fortalece e lasonan entre Aruba y Colombia, pero tambe ta un oportunidad pa celebra hermandad, cultura y historia comparti entre ambos nacion.

Ta considera ARC Gloria como un embahador flotante di Colombia riba e lamanan di mundo. El a yega cu un tripulacion cu ta consisti di oficialnan, cadet y personal civil cu orguyosamente ta representa nan pais y Armada Nacional de Colombia.

Durante e bonbini oficial, Minister mr. Wendrick Cicilia, a expresa su admiracion pa e rol cu ARC Gloria tin pa promociona diplomacia internacional, educacion maritimo y intercambio cultural.

“Tipo di bishita manera esun di ARC Gloria ta fortalece nos relacionnan bilateral y ta ofrece nos comunidad e oportunidad pa di experencia un parti significativo di historia y cultura naval di Colombia”, tabata expresion di Minister Cicilia.