Aruba ta cla pa Ban Bek Caya “Back to School edition”

Diamars merdia a tuma luga un reunion entre Minister President mr. Mike Eman hunto cu Minister di Economia mr. Geoffrey Wever cu e comerciantenan cu ta forma parti di e actividad di Ban Bek Caya. Ban Bek Caya ta un iniciativa di Gabinete AVP-Futuro cu e meta pa reactiva comercio den Caya Grandi y trece famianan hunto den un ambiente di shopping night. For di e prome edicion te cu esun di e siman aki, por sinti e entusiasmo grandi di cada comerciante cu ta duna nan maximo coopreracion, conhuntamente cu gobierno y tur instancia envolvi, pa haci esaki e exito cu ta mira awe.

E creatividad/feedback di cada comerciante ta contagioso, locual ta haci cu gobierno di su banda tambe ta duna tur nan empuhe pa sigui engrandece e actividad aki.

E siguiente Ban Bek Caya ta programa pa diabierna awo, dia 8 di augustus y lo ta dedica na Back to School, cu lo conta cu un sin di oferta pa prepara pa e aña escolar nobo.

Cu e meta pa engrandece aun mas e anochi di compras aki, e organisadonan ta  buscando colaboracion cu mas partner strategico pa asina stimula e curiosidad di mas bishitante pa area di Caya Grandi. Meta lo ta pa dirigi un cantidad grandi for di e area turistico, pa e actividad di Ban Bek Caya y asina garantisa mas cliente y benta pa e comerciantenan.

Durante di e reunion, comerciantenan a expresa algun preocupacion y idea con pa mehora aspecto pero tambe con pa traha hunto pa promove aun mas e bunita actividad aki pa famianan y mundo comercial den Caya Betico Croes.