EXPO LIVE WELL, AGE STRONG
DOZ no solamente ta encarga cu asuntonan relata na nos adultonan mayor actual, pero tambe cu esnan cu den futuro lo yega na e fase di bida aki. Pa sigura cu nos futuro adultonan mayor ta mas miho prepara pa e momento cu nan ta baha cu pensioen, DOZ tin como tarea pa conscientisa e pueblo di Aruba di e importancia di cuminsa planea na un edad jong caba con pa yega na e fase di adulto mayor cu un bon salud fisico y mental, cu un bon calidad di bida, cu suficiente entrada y cu un vivienda adecua. Pa e motibo aki y conhuntamenta cu Onderlingehulp y cu cooperacion di Raw Fitness Aruba, nos ta organiza e expo LIVE WELL, AGE STRONG.
E expo aki ta wordo organisa pa e comunidad di Aruba henter y muy en especial pa esnan di edad mas hoben cu ainda no a cuminsa pensa riba kico tur mester tin cla pa na momento cu nan yega na e edad di adulto mayor.
E expo ta parti den 4 topico: salud, bienestar, entrada y vivienda. Durante di e expo lo tin presentacionnan informativo y interactivo di diferente instancia, entre 15 pa 20 booth informativo na unda por pasa pa haya mas informacion, actividadnan fisco, entre otro yoga, y tambe un competencia di squad, deadlift y bench press.
E expo lo tuma lugar diabierna 23 di mei 2025 for di 5 or di atardi pa 9 or di anochi na Raw Fitness Aruba (L.G. Smith Boulevard 152, ex Kong Hing Supermarket). E entrada y e participacion na e competencia ta completamente gratis.
Durante e expo lo tin algun persona cu lo hasi un encuesta cortico pa asina nos por haya sa cual ta e topiconan di interes pa comunidad di Aruba pa cual nan lo desea di haya mas informacion. Di e forma aki nos por tene esakinan na cuenta den otro eventonan di informacion y conscienticacion.
Join nos pa asina bo tambe ta bon informa y prepara!
Pa mas informacion por tuma contacto cu Directie Ouderenzaken na 280-5004 of por manda un e-mail na info@doz.aw tambe por like nos pagina di Facebook Directie Ouderenzaken of follow nos riba Instagram directieouderenzaken.