PARTIDO MEP : Miembronan di Parlamento Hulandes ELOGIO PA GABINETE WEVER-CROES SU MANEHO FINANCIERO

ARUBA TA DEN CUMPLIMENTO

ORANJESTAD – Recientemente Aruba a ricibi varios bishita di presidentenan y miembronan di Parlamento Hulandes, cu a bin pa reuni cu Gobierno y cu  miembronan di Parlamento di Aruba.  

Durante e reunion nan a toca varios punto relevante, pero loke cu a resalta tabata e elogionan pa e gobierno saliente di Aruba, cu a sa di trece stabilidad financiero bek na Aruba. Tambe e presidentenan y parlamentarionan Hulandes a comparti e orguyo cu Aruba tin surplusnan financiero pa 3 aña consecutivo, algo cu ni Hulanda no a logra. Nan a elogia e vision di crea espacio financiero prome, y pa awor por brinda alivio na comunidad na un forma responsabel.

Tambe  nan tabata tin e oportunidad pa bishita varios instancia, na unda por a mira cu apesar cu financieramente Aruba ta recuperando, ainda tin retonan social grandi pa atende. Cu esaki ta spera cu ora nan mester trata temanan di importancia pa Aruba den Parlamento Hulandes, nan por tene cuenta cu e retonan aki.

E tipo di bishitanan aki ta importante pasobra tin biaha, den Parlamento Hulandes, e miembronan ta haci expresionnan di pais Aruba, cu en realidad si nan tabata conoce e isla personalmente, nan no lo haci. Y na mes momento cu nan ta elogia Aruba pa e stabilidad financiero, nan  ta expresa nan preocupacionnan pa Aruba no cai bek den mal maneho financiero, conduciendo asina atrobe na un welga di hamber pa sr Mike Eman, manera antes ora e tabata Prome Minister.