Parlamentario Otmar Oduber di PPA ta felicita tanto gobierno saliente como esun actual p’e paso positivo tuma pa nos grandinan

No mester pronkia cu pluma di otro:
Durante conferencia di prensa diamars mainta, Parlamentario Otmar Oduber di PPA, a felicita comunidad di Aruba, specialmente nos grandinan, cu nan aumento di pension como e lista di remedi. PPA ta sumamente contento di por wak dos punto di accion, cu tabata inicialmente proposicion tambe como partido su plan di Gobernacion, worde ehecuta.
“For di januari 2024, via plataforma Pais e momento ey, ya cu nos no tabata sa cu lo tin eleccion asina trempan, nos a duna atencion pa bin cu e discusion fundamental aki tocante remedi di nos grandinan, cu a wordo kita for di nan como tambe aumento di pension”, Oduber a enfatisa.
Parlamentario Oduber a indica cu e accionnan aki, politica ta demostra cu si tur pone nanishi worde poni den mesun direccion, por logra cosnan grandi pa bienestar di nos hendenan y pais. P’esey mes Oduber ta gradici tanto e Gabinete saliente di MEP/RAIZ pa haci esaki posibel, sea ta mediante di medida of no, unda e situacion financiero actual a duna espacio pa e Gabinete AVP/FUTURO ehecuta y realisa esaki.
“Nos grandinan por ta sigur cu nos lo sigui boga y lucha pa e derecho aki di nos grandinan. E aumento di 250 florin entrante 1 di mei, a pesar cu e compromiso di campaña cu nos grandinan tabata di 700 florin y di cual nos partido PPA a hasta presenta un amienda pa e gobierno actual por a cumpli cu esaki, pero lamentablemente tanto AVP como Futuro a vota contra. Sinembargo nos ta gradici e Gabinete actual pa toch realisa e 250 florin y nos lo bay vigila hopi di cerca e compromiso haci na nos grandinan di 700 florin.”
Den e programa di partido, PPA a indica tambe cu mester pone bek e remedinan riba e lista positivo, pero na un forma mas sostenibel y duradero. E proposicion di AVP y FUTURO inicialmente tabata pa pone esaki via un ‘toeslag’, pero PPA a para pa pone esaki den ley di AZV, pa den futuro evita cu lo por bolbe kit’e bek for di nos hendenan, ya cu nos ta papiando di casi 130 remedi y awor pueblo a haya esaki bek manera PPA tawata boga pe, pa motibo cu AZV mes tin e fondonan pa por haci esaki.
“Ta importante pa duna reconocimento na tanto e gobierno anterior como na e gobierno actual y no mester bira un asunto di pronkia cu pluma di otro, paso na final di dia ta e pueblo y nos pensionadonan a sali gana, manera cu PPA a boga y defende den su programa di partido y durante cada debate den e eleccion na December ultimo”, Parlamentario Otmar Oduber a finalisa bisando.