Ryçond do Nascimento:E formador ta fix: Mike Eman ta konkel cu nombracion di minister Aruba, 13 di juni 2025

Kico Mike Eman mes tabata sa?

Como formador y lider di AVP, Mike Eman tabatin e palabra final riba e composicion di gabinete y e poder pa promove un candidato pa minister. Un di e candidatonan tabata su mes amigo y ex-minister Mike de Meza, kende tabata responsabel pa Belastingdienst durante Gabinete Mike Eman I. E screening di De Meza a demostra cu durante su cargo como minister di Finanza e no a cumpli cu su declaracionnan fiscal, el a laga su debenan acumula y eventualmente e debenan a caduca. Mas serio ta cu aparentemente el a beneficia di e falta di control den su mes departamento, pasobra ta su mal maneho a yuda su debe caduca (verjaring). Sin embargo De Meza no ta e antagonista principal di nos estado di derecho. Esaki ta un storia di Eman y huristanan sin escrupulo cu ta busca manera pa frustra normanan di integridad hancra den ley.

1. De Meza no a pasa e screening

Despues di e eleccion di dia 6 di december 2024, cu AVP y FUTURO hunto a logra un mayoria, Mike Eman y Gerlien Croes a wordo nombra como formadornan di un gabinete nobo. Den e proceso ey, AVP a propone Mike de Meza como futuro minister di Energia, Infrastructura y Medio Ambiente.

Siguientemente e formadornan a inicia e proceso di screening di integridad fiscal riba 18 februari 2025 manera e Landsverordening Integriteit Ministers (LVIM) ta stipula. E screening ey a trece na luz cu De Meza tin probleman fiscal grave. P’esey gobernador no por a duna luz berde na nombracion di De Meza.

2. Como minister di finanza De Meza sumes no tabata cumpli cu su impuesto

E screening a confronta Mike Eman cu un situacion incomodo: bao di su Gabinetenan De Meza tabata negligente y ademas probechando di un Departamento di Impuesto debilita. Como minister, e tabata sa bon cu e proceso di cobra impuesto ta poco poco y cu esey por conduci na debenan cu ta caduca (verjaar). E echo cu un ex-minister por a uza su periodo na mando pa laga su obligacion fiscal desaparese ta pone un nubia moralmente scur riba Gabinetenan Mike Eman I y II.

Pa e motibo ey, e papel di Mike Eman den henter e asunto aki ta bira mas serio. Como formador y lider di partido, e mester a sigura e integridad di e proceso di screening.

3. Mike mes a diseña un ruta di contrabando: e ‘declaracion di conducta fiscal’

Aparentemente, despues di e luz cora di gobernador, Mike Eman a busca un ruta pa bay rond di e screening prescribi pa ley. De Meza a haya e conseho pa pidi un declaracion di conducta fiscal comosifuera e ta un cuidadano normal cu no tin mester di un examinacion mas profundo relaciona cu su ambicion pa bira minister.

Dia 7 april 2025 De Meza y su señora a presenta un peticion na belastingdienst pa pidi tal declaracion, fuera di e marco di e ley di screening y cu e intencion pa evita un evaluacion di su pasado y conducta fiscal. Confiando riba Mike Eman el a spera cu asina nan lo por forsa gobernador acorda su nombracion. Mike Eman mes tambe tabata conta riba e declaracion di conducta fiscal pa manipula opinion publico bisando: “Departamento di Impuesto mes a bisa cu e no tin debe” y asina e lo tabatin un herment pa troce e storia aki.

4. Mike a diseña un di dos ruta di contrabando: busca e declaracion cerca hues

Ora directora di DIMP a nenga dos biaha (14 y 28 april), pa colabora cu e wega di Mike Eman, supuestamente Mike a duna De Meza e conseho pa busca e declaracion cerca hues.

Dia 9 di mei 2025 De Meza a presenta su demanda na hues, pa forsa belastingdienst duna un declaracion positivo. E abogado di De Meza tabata Desiree Croes, ex-parlamentario di AVP y miembro di un famia fiel na Eman. Desiree a wordo asisti pa Duineveld, kende su mes tabata tin vinculonan dudoso den pasado. Nan plan tabata: uza hues pa crea un documento pa contradici e screening di Departamento di Impuesto. P’esey en realidad tabata trata di un bypass huridico camufla como conflicto legal.

5. Hues a para nan, lagando e batata cayente den scochi di Mike

Riba dia 4 juni 2025 hues a bisa cu e no tin e competencia pa forsa Departamento di Impuesto duna De Meza e documento na smaak di Eman y De Meza. Hues a splica cu carta di Departamento di Impuesto no tabata contene ningun decision legal, solamente un relato di echonan.

Tambe hues a mustra claramente cu Mike Eman mester tuma un decision final basa riba e declaracion cu tin caba di Departamento di Impuesto. O sea, e mes persona cu a inventa e plan pa bypass e proceso regular di screening, a haya e mensahe cu e mester tuma responsabilidad y saca su mesun conclusion si e por presenta De Meza como candidato na gobernador. P’esey e pregunta clave ta: Mike Eman lo propone un candidato cu yen bandera cora den su file? Of Mike porfin lo defende integridad institucional?

Pregunta final: oportunismo politico lo prevalece riba respet pa ley y moral?

Ta parce cu Mike Eman ta prefera lucha pa interes di partido en bes di interes di nos pais. Na luga di respeta e screening di integridad el a inventa un caminda administrativo pa bruha tera. Y ora e no a logra esaki, el a purba konkel e proceso uzando hues. Esaki ta un wega di tactica di poder, pero alabes un atentado riba nos estado di derecho.

Si e formador mes ta bay contra e proceso di screening cu tey pa proteha nos pueblo contra explotacion pa probecho personal, ya caba nos ta biba den un pais caminda interes di partido ta mas importante cu bienestar di pueblo.

P’esey e pregunta di momento no ta si De Meza por ta minister pasobra e contesta riba e pregunta ey ta evidente. E pregunta mester ta si Mike Eman mes no a hinca un cuchiu den lomba di pueblo y e estado di derecho c’un prome minister ta supose di defende?