MEP ta exigi claridad riba nombramento di señor Franklin Hoevertsz na Utilities Aruba

E GOBIERNO AKI TA KITA HENDE DRECHI PA PONE HENDE DI REPUTACION DUDOSO

Fraccion di MEP den Parlamento a haci preguntanan oficial na Minister Arthur Dowers cu ta encarga cu energia, exigiendo claridad y responsabilidad tocante e nombramento reciente di señor Franklin Hoevertsz como miembro di hunta di Comisario di Utilities Aruba N.V.

Segun informacion confirma, señor Hoevertsz a wordo removi den pasado di dos puesto clave: prome como director na FCCA pa supuestamente ta involucra den practicanan irregular financiero, incluyendo preferencia na contratista sin proceso di licitacion, y a cambio pa beneficio personal. Despues, el a wordo destitui di su funcion como director statutario na Utilities Aruba N.V., pa motibo di falta di confiansa den dj’e, despues cu un investigacion interno a revela actonan inaceptabel.

Ademas, den e dianan aki, ta circula riba medionan social publicamente acusacionnan serio di abuso sexual di (por lo menos un) menor, cu a crea indignacion den comunidad.

Anto asina mes Minister Arthur Dowers a sigui cu nombramento di e señor Hoevertsz den un puesto cu ta exigi integridad, transparencia y liderasgo etico.

Fraccion di MEP ta pidiendo e Minister:

1.⁠ ⁠Si el tabata na altura di e historia turbulento di señor Hoevertsz den companianan estatal den pasado;

2.⁠ ⁠Si algun screening di integridad a wordo haci;

3.⁠ ⁠Kico gobierno tin pensa di haci tocante e acusacionnan publico di abuso sexual di menor;

4.⁠ ⁠Con nombramento aki ta pas den e supuesto compromiso di e gobierno Eman-Croes di bon gobernacion;

5.⁠ ⁠Y si e ta dispuesto pa reevalua of revoca e nombracion.

MEP ta exigi responsabilidad, proteccion di e confianza publico, y un gobernacion integro y husto. A pidi e Minister pa contesta den dos siman. Mester remarca cu apesar cu algun pregunta a wordo contesta mientras tanto, fraccion di MEP tin mas di 500 pregunta haci na gobierno, sin a haya contesta.