DECLARACION Fraccion Parlamentario di Partido di Pueblo Arubano AVP

ORANJESTAD – 12 di juni 2025 – Den luz di e desaroyonan mas reciente rond di e retonan fiscal/legal cu nos colega di fraccion y candidato pa minister, Mike de Meza ta enfrenta, nos como Fraccion Parlamentario di AVP ta expresa nos solidaridad cu su persona, pero sigur tambe nos preocupacion profundo tocante e dificultad cu e situacion aki ta crea pa nos sistema democratico y e principio fundamental di e Trias Politica na Aruba.

E falta di transparencia den informacion, hasta na e persona concerni ta laga espacio pa speculacion.

Fraccion di AVP ta condena tur tipo di tardamento inusual of calcula den cualkier proceso y sigur den formacion di gobierno of nombramento di un minister.

E ta un prijs hopi halto pa Pais Aruba paga ora cu awendia, mas cu nunca, tin mester di solucionnan rapido y acerta.

Na e momentonan aki nos infrastructura y energia — sectornan cu ya pa añanan ta manca pa un serie di ley anticua, procedura lento, burocracia y te hasta investigacion administrativo – ta bou un direccion ministerial temporal y limita, mientras cu tin asuntonan nacional urgente cu ta pendiente di un titular cu por dun’e su total y debido atencion.

Den un situacion asina, nos ta sinti cu e Parlamento, como un pilar di estado, tin un rol crucial pa asumi su responsabilidad pa urgi gobierno pa tuma accion den e asunto, dialoga cu e partidonan al caso y bin cu un resolucion pronto y definitivo.

Den mesun rosea ta haci un yamada cla y formal na  Ministerio Publico pa conduci su funcion di un manera rapido, transparente y husto pasobra Aruba merece claridad y progreso y no confusion of stagnacion.

Mientras tanto, fraccion di AVP ta sigui cu su propio responsabilidad di atende cu e asuntonan cu mas ta afecta e pueblo di Aruba: topico manera costo di bida, sistema digno di cuido medico  y investigacion serio di iregularidad di parti di e gabinete anterior, riba maneho di transicion di energia y tratamento di desperdicio, entre otro.

Fraccion di AVP ta keda firme den su compromiso cu e pueblo Arubano, cu speransa y cu un fe den nos democracia y e capacidad di nos institucionnan di surpasa obstaculo y pone pais bek riba e caminda di bienestar y prosperidad