Otmar Oduber (PPA): “Cuater luna despues y ainda no tin claridad den e caso di e hoben Lanoy”

Oranjestad, Aruba – Parlamentario di fraccion PPA, Otmar Oduber, a expresa su profundo preocupacion tocante e deficiencia di transparencia y seguimemto den e caso tragico di e hoben Ayden Lanoy. A pesar cu Parlamento a entrega un mocion uniname y promesa haci di gobierno, e situacion ta keda den silencio y e confiansa di comunidad den e cuerpo policial ta tambalea.

Deficiencia na seguimento riba mocion y pregunta
“Cuater luna despues di e incidente y ainda no tin un claridad publico riba kico a pasa of kico ta e pasonan cu Ministerio Publico ta bay tuma” Oduber a expresa. Ta di lamenta cu a priminti famia cu dentro di 3 luna lo tin claridad, pero te ainda nada. Oduber a sigui bisa cu: “Parlamento tabatin un mocion uniname, pero nos ta wak cu gobierno no ta cumpli cu e mocion y ta mas di 4 luna di e incidente y bo no ta scucha nada y esey ta trece inkietud den e transparencia con e cosnan mester cana”. Banda di esey fraccion di PPA a entrega for di 17 di april un total di 23 pregunta na minister di husticia, no solamente relaciona cu e caso tragico aki, pero tambe otro pregunta relaciona cu maneho y protocol di cuerpo policial. Dos luna a pasa y ainda no tin niun contesta.  

Preocupacion riba funcionamento di cuerpo y maneho

Oduber ta subraya cu e ta preocupa con ta atende cu henter e asunto aki structuralmente dentro di Cuerpo Policial Aruba. “Kico ta pasa cu e implementacion di bodycams, dashcams, sosten structural di psicologo, trainingnan y protocolnan duidelijk tocante e uzo di arma y persecusion den bario? Comunidad di Aruba tin derecho riba seguridad y claridad”, el a sigui elabora.

Confiansa den polis y husticia ta tambalea
E retraso den haya contesta y silencio di ministerio di husticia ta mina e confiansa di ciudadano den autoridad. “No tin excusa cu despues di 3 luna ainda nos no sa si tin vervolging of no y a base di kico”, segun Oduber. Y mas tristo ta, cu e famia ainda ta warda pa haya aclareacion. Ta momento pa e ministerio en cuestion asumi su responsabilidad y duna contesta y indica kico ta e medidanan cu e ta bay tuma. Transparencia no ta un opcion, e ta un obligacion.

SPA y su peticion

“Fraccion di PPA a haya un carta di SPA tambe, unda cu nan ta indica cu nan no ta mira un problema pa haci test di droga, pero esaki mester ta balido tambe pa tur otro instancia y mi ta completamente di acuerdo cu esaki”, Oduber a comparti.

Porfin tin ‘vragenuur’!
E 23 preguntanan cu e parlamentario a haci ta cu e meta pa haya claridad y pa brinda informacion na comunidad, p’asina por restaura e confiansa den aparato policial y husticial. “Finalmente mi ta wak cu a yama un reunion, diahuebs 12 di juni pa 2 or pm den un ‘vragenuur’, unda cu fraccion AVP a haci 3 pregunta riba e topico aki. Ta importante pa sa kico a sosode, pero mas ainda pa sa si ta atendiendo cu e asunto aki dentro di Cuerpo Policial pa den futuro e no pasa atrobe” Oduber a finalisa bisando.