Parlamentario Stephany Sevinger: Cooperacion cu Maryland ta habri porta pa beca, deporte y renovacion economico

ORANJESTAD (28 di mei 2025) – Honorabel miembro di Parlamento, Stephany Sevinger a regresa di su reunionnan oficial den e estado di Maryland, Estados Unidos, cu un bista positivo riba e lasonan existente y e gran potencial pa ampliacion di cooperacion entre Aruba y es estado strategico banda di capital Washington D.C. El a comparti e detayenan durante e conferencia di prensa semanal di partido AVP.

Ta asina, por ehempel, cu Aruba ya tin un Memorandum of Understanding (MOU) firma cu e estado di Maryland y e reunion reciente a sirbi como un momento pa no solamente reactiva e acuerdo aki, pero tambe pa explora rumbonan nobo di colaboracion. “Nos a sinta cu un di nan representantenan y nos a mira cu tin hopi interes pa amplia e cooperacion, specialmente den tereno di deporte, intercambio educativo y infrastructura innovativo,” segun Sevinger.

 “Nan tin interes pa organisa torneo deportivo na Aruba, unda nos hobennan por siña, intercambia y crece den ambiente deportivo positivo. E intercambio tambe por habri porta pa nos hobennan bay studia na Maryland, caminda beca y programanan educativo ta realmente disponibel y amplio,” Sevinger a destaca.

Durante e bishita, Sevinger a tuma nota tambe di un desaroyo innovativo den Maryland cu por sirbi como inspiracion pa Aruba. “Nan a transforma terenonan industrial bandona den area nobo yama Trade Port Atlantic, un hub pa comercio, turismo y recreacion. Esaki ta sumamente relevante pa Aruba, mirando nos realidad actual cu e refineria. Nan a yega na solucion y nos por siña hopi for di nan experiencianan pa posiblemente aplica den nos contexto,” segun Sevinger.

Aparte di comercio y educacion, e dialogonan tambe a cubri tema climatico y siguridad. Maryland, como un estado banda di lama, ta enfrenta mes tipo di desafionan climatico manera Aruba. “Nos a topa cu departamento di siguridad, di educacion y otro entidad estatal. Esaki ta mustra cu Maryland ta comprometi den un colaboracion serio y sostenibel cu Aruba. Ya nos tin base y relacionnan formal y awo nos tin e oportunidad pa fortalece esey y avansa hunto.”

Stephany Sevinger a enfatisa e importancia strategico di Maryland como un partner: “Maryland ta cerca di Washington D.C. y su posicion ta haci e estado aki relevante no solamente pa Aruba, pero pa strategia regional. E cooperacion cu nan por trece beneficionan concreto pa nos pueblo — educativo, comercial, deportivo y ambiental.”

E parlamentario ta pone cla cu Aruba mester busca alianza cu ta genera resultado. “Nos mester traha cu paisnan y estadonan cu por yuda nos crece y diversifica. Maryland a mustra cu nan ta habri pa esey, y Aruba ta cla pa sigui traha riba e relacion aki den manera structural y transparente.”