Otmar Oduber (PPA): “Mientras Hulanda tin tur supervision financiero mediante CAFT, nanmeta ta pa haya dominio y control total”

Un di e puntonan cu constantemente parlamentario Otmar Oduber di fraccion di PPA ta trece
dilanti como debate politico actual ta: Rijkswet. Otmar ta cuestiona cu ningun otro partido no
ta poniendo atencion na esaki, mirando cu nos autonomia y autodeterminacion ta na filigrana y
ta keda presenta Rijkswet como un salida bunita pa Aruba. Pero tras di tur e ‘bunitesa’,
promesa y cifra, tin un realidad peligroso scondi: Hulanda no ta busca solamente supervision,
pero nan ta busca dominio y control completo.
Un historia di dependencia y lucha
Aruba a paga caro pa su autonomia y parce cu e politicanan jong y moderno ta lubida riba esey.
Prome cu Status Aparte di 1986, Aruba tabata un ‘appendix’ di Corsou, sin bos ni voto den e
decisionnan crucial. “E lucha di e pioneronan politico, manera Juancho Irausquin, Shon A. Eman,
Henny Eman y Betico Croes, tabata netamente pa sali for di e dependencia y pa tin nos propio
destino, placa, parlamento y gobierno den man. Awor, casi 40 aña despues, Aruba ta para
dilanti di un otro crusada crucial di kico ta bay pasa durante e proximo 13 añanan. E Rijkswet ta
propone no solamente un cuadro di supervision financiero, pero e ta mustra di ta mas un
instrumento di dominio y control total di Hulanda, pa limita e decisionnan na Aruba y pa pone
nos autonomia na linea,” Otmar a subraya.
Les di Corsou: 10-10-10
“Nos no mester bay mucho leu pa busca ehempel. Corsou na 10-10-10 a ricibi un ‘clean slate’;
Hulanda a elimina tur nan debenan, dunando nan un comienso nobo. Pero awe, menos di 15
aña despues, Corsou ta un biaha mas den e mesun debe grandi”, Otmar a indica. E mesun
modelo cu a priminti un futuro stabiel, no a resulta y na Aruba tampoco. “Paso CAFT no t’ey di
awor. Ya CAFT t’ey desde 2015 caba y e supervision financiero no a preveni mas debe, sino a
crea un dependencia Eterno. Awor kier forsa Aruba pa sigui e mesun caminda, cu den cierto
forma tur e gobiernonan anterior a contribui pa nos a yega asina leu.”
Hulanda a probecha di un pandemia
Durante e pandemia, cu tabata un crisis mundial y sin precedente, Hulanda a pone cuchiu na
garganta di Aruba. Hulanda a dicidi pa probecha di e situacion financiero y a pone condicion
inhusto pa Aruba ricibi apoyo financiero. Si Aruba no a bay di acuerdo e momento ey, ta hopi
mas hende a keda sin cobra y hopi lugar crucial lo a bay plat. Pero e ayudo aki tabata mas un
prestamo cu un pago bek inhumano. Aruba mester paga loke el a fia den momento di pandemia
y crisis, un interes di 6.9%, mientras cu Hulanda a regala fondo monetario astronomico na
diferente pais y nan mes por ricibi financiamento internacional na un interes hopi mas abou.

Realidad vs Ilusion
E discurso actual cu nos ta scuchando tur caminda di AVP y FUTURO ta: “Si nos firma Rijkswet,
nos lo por inverti den infrastructura, proyectonan grandi y crecemento economico pa tur.”
Esaki ta e propaganda cu AVP y FUTURO ta uzando, lubidando cu tras di e promesanan ey, tin e
veneno scondi. Pa cada inversion cu Aruba por haya, nos lo perde libertad di maneha nos
finansa y autonomia. Esaki ta un deal unda nos ta entrega nos autonomia y autodeterminacion
pa placa cu eventualmente no lo yega na pueblo.
Un traicion na lucha di 40 aña
Otmar Oduber ta adverti: “E politiconan hoben no sa di e lucha y historia di nos antepasadonan.
Y esey ta un punto crucial. E generacion cu a lucha pa Status Aparte no a haci esaki, pa awor na
2025 nos entrega autonomia den un bachi di ‘supervision’ of ‘inversion’. Si Aruba firma e
Rijkswet y nos no forma un frente nacional, nos ta basicamente bolbe den un estado di ta
sumiso, mescos cu prome cu 1986, djis den un bachi moderno”.

Aruba ta na un crusada crucial den su historia. Aruba no por sigui cay den trampa di un
promesa, cu ta pone nos futuro den man di otro. Status Aparte tabata un gran victoria, lucha y
sacrificio di mas di 40 aña. Awe, nos no por djis traiciona e lucha aki. Rijkswet ta un paso atras,
un regreso na dependencia. Aruba mester skirbi su mesun futuro, sin tin mester di laga Den
Haag ta e autor.