Parlamentario Evelyn Wever-Croes:LEY PA HISA SALARIO MINIMO : GOBERNANDO DESDE OPOSICION

ORANJESTAD – Diaranson mainta, Parlamento a cuminsa trata e cambio di e ley di sueldo
minimo, y ta bai hisa esaki pa tur hende. Esaki ta un proyecto di ley cu Gabinete Wever-Croes a
traha hopi duro riba dj’e, y ta gradici Parlamentario di MEP Shailiny Tromp-Lee pa tur esfuerso
cu el a haci pa logra esaki. Tambe ex minister Glenbert Croes cu a traha riba e ley aki. Durante
gobernacion di Gabinete Wever-Croes I y II a aumenta e sueldo minimo 4 biaha, esaki lo tabata
di 5 biaha pero no a alcansa prome cu a sali di gobierno. Sinembargo awor si e ta bai bira un
realidad.
TRAYECTO DI E LEY
Na aña 2018 Parlamentario Shailiny Tromp-Lee a tuma e inciativa pa e ley aki, y a cuminsa cu
un serië di ronda di consulta. Pandemia a frena e trabounan, pero despues por a finalisa e ley.
Na aña 2023 ex-minister Glenbert Croes a presenta e ley na ministerraad cu a wordo aproba riba
15 di december 2023. Despues e ley a cana su caminda pa e diferente consehonan di SER y
Raad van Advies, y a wordo entrega na Parlamento na comienso di november 2024, cu
intencion pa introduci e salario minimo nobo, entrante 1 di januari 2025.
Sinembargo, desde september 2024 oponentenan a tuma poder den Parlamento y no kier a trata
e ley. Esaki a perhudica casi 5000 persona cu ta gana sueldo minimo, inhustamente. Fraccion di
MEP e aña aki a pone basta presion, y porfin awor e ley a wordo trata den Parlamento.
Lamentabelmente e reunion a wordo para y no tin fecha nobo ainda.
KICO TA E CAMBIONAN PROPONI?
E sueldo minimo na e momentonan aki ta 1.986 florin y e ta bai subi pa esnan cu ta traha 40 ora
pa siman, te na 2.007 florin. Un aumento di 20,85 florin pa luna. Si bo ta traha 42 ora pa siman,
e salario minimo lo bira 2.107 florin, e aumento ta 121 florin. Si bo ta traha 44 ora pa siman, e
salario minimo lo bira 2.207 florin, e aumento ta 221 florin. Y si bo ta traha 45 ora pa siman, e
salario minimo lo bira 2.257 florin, e aumento ta 271 florin.
“Mi ta hopi contento cu e cambionan aki. Mayoria di esnan cu lo bai dilanti den salario ta hende
muhe, y esey ta haci mi mas contento ainda. Gobernando desde oposicion cu hopi amor pa
Aruba. Mi ta spera cu e reunion wordo yama liher pa nos yuda e casi 5000 mama y tata nan di
famia”, lider di Fraccion di MEP Evelyn Wever-Croes a duna di conoce.