Premier Mike Eman: “Casi 8 aña di abandono total di nos barionan

Durante e tratamento di e Presupuesto Supletorio 2025 dialuna anochi, Prome Minister
mr. Mike Eman a presenta cu fervor e realidad hopi preocupante cu Gobierno a hereda:
un isla cu literalmente tur su bario- y distritonan a keda bandona. Despues di casi ocho
aña di abandono, dificilmente pueblo Arubano lo por bolbe haña confiansa den su
gobierno.
Pa gana e confiansa di e comunidad bek, tur siman Prome Minister Eman ta den e
barionan tur rond di Aruba pa papia y scucha e pueblo. A acercamente personal aki ta
habri caminda pa pueblo comparti nan preocupacion den combersacion directo cu
Prome Minister y su ekipo cu ta acumula informacion pa crea maneho cu ta mas dirigi
riba e necesidadnan real.
Eman a enfatisa cu ta un berguensa nacional cu e ex ministernan di e gobierno anterior
ta gaba cu nan a laga un “surplus” pa e gobierno nobo, ora cu esaki a bin a costo di e
bienestar di e pueblo. Pa Premier Eman, e bario y distritonan di Aruba ta e berdadero
curason di nos gobierno. Si gobierno mes ta descuida e barionan, por spera cu e
pueblo tambe lo bay den e mesun direccion. E abandono ta un ofensa directo na tur
ciudadano di Aruba.
Awo, ta tarea di Gabinete AVP-Futuro pa haci tur esfuerso pa recupera di e deterioro
aki pa asina motiva e barionan pa cambia e comportacion tambe. Accionnan di Bario y
Baki den Bario ta algun esfuerso cu ta haciendo regularmente pa logra e meta di trece
dignigad bek den e barionan.
Gabinete AVP-Futuro si ta duna bek na comunidad, y ta crea un balans den desaroyo y
bienestar den cada hogar.