Parlamentario Evelyn Wever-Croes : NA NINGUN MOMENTO GABINETE WEVER-CROES A LAGA UN DEBE DI 200 MIYON ATRAS. ALCONTRARIO A LAGA UN SURPLUS DI 500 MIYON FLORIN PA YUDA E COMUNIDAD DI ARUBA

ORANJESTAD – Recientemente por a nota den medionan di comunicacion un comunicado na unda ta menciona cu ex Prome Minister Evelyn Wever-Croes y ex Minister di Finansas Xiomara Maduro a laga un debe di 200 miyon florin atras. Parlamentario Wever-Croes a expresa cu esaki ta un mentira mas contra e gobierno anterior di Gabinete Wever-Croes, mirando cu na ningun momento a laga debe atras sino un surplus di 500 miyon florin.

Tambe ta wordo menciona cu e debe aki a wordo teni den secreto pa e dos gobernantenan aki, pero esaki tampoco ta berdad mirando cu Minister Geoffrey Wever tabata den ministerraad di e gobierno anterior y ta actualmente den e ministerraad actual, pues nada cu a wordo haci y papia por ta un secreto si e sa di tur loke tabata andando.

Parlamentario Wever-Croes a indica cu e comunicado cu a sali ta referi na e privatizacion di RWZI, cu tabata un problema cu pa 20 aña no tabata tin solucion. Gabinete Wever-Croes e tempo ey a busca tur manera pa bin cu un solucion pa e problema aki, y a hasta aloca un suma di 16 miyon di e 60 miyon cu tabata necesario, den e presupuesto di 2022. Riba esaki Caft e tempo ey a reacciona y a pidi gobierno pa saca e suma aki di e presupuesto mirando cu e suma aki mester wordo uza pa paga debe. Aki ta unda cu Gabinete Wever-Croes a saca e 16 miyon florin di e presupuesto lagando atras e problema di RWZI sin wordo atendi.

Pa logra yega na un solucion pa cu e problema di RWZI,  no a keda gobierno mas opcion pa privatisa e planta. Pa evita cu e gastonan di e privatizacion aki cay riba e comunidad di Aruba, gobierno a introduci e “wastewater sustainable fee” di $20 cu mester wordo paga un bez pa aña door di nos bishitantenan. Pues tur otro storia cu ta wordo conta eyfornan pa purba trece confusion pa loke ta e gastonan di RWZI, ta nada mas cu un mentira mas pa desacredita e bon trabou di e Gabinete anterior.