IMPORTANCIA DI INTEGRIDAD DEN NOS APARATO GUBERNAMENTAL
Parlamentario Evelyn Wever-Croes:
ORANJESTAD – Den e maneho di personal di Pais Aruba ta stipula cu un futuro empleado
publico no por tin antecedentenan penal. E regla aki no ta solamente un formalidad, sino un
fundeshi pa e confianza cu pueblo mester por tin den su gobierno. Integridad y confiabilidad ta
e base riba cual bon gobernacion ta para. Pesey durante gabinetenan Wever-Croes 1 y 2 nos a
pone integridad central, y caminda por tabata tin kiebro di integridad, nos a tuma accion mesora.
Sinembargo, nos ta mira cu den e gobierno actual tin empleadonan nombra na oficinanan di
minister cu a yega di haya nan mes den contacto cu justisia of cu tin antecedentenan penal. Aki
ta referi na diferente situacionnan, desde buracheria den publico y core bou influencia di
alcohol, te na casonan mas serio manera violacion di secrecia di trabou, hortamento y mal
maneho. Esaki ta trece duda cu si e reglanan ta wordo aplica pa tur hende igual, y ki señal nos ta
manda como pais.
Ta importante pa compronde cu e escohencianan aki tin nan impacto. Pa nos empleadonan
publico cu diariamente ta dedica nan mes cu profesionalismo y entrega, por ta demotivante pa
mira cu regla di integridad no ta wordo aplica na tur nivel. Tambe pa nos studiantenan, cu ta
prepara pa un futuro den sector publico, esaki por desanima nan. Nan dedicacion y ambicion ta
merece un gobierno cu ta mustra bon cla cu integridad ta conta.
For di e preocupacion aki nos fraccion a manda preguntanan na minister-president. Ta
importante pa sa kico ta e maneho cu e gobierno ta aplica ora di nombra empleado, si ta check
antecedentenan penal, y con por hustifica cu tin empleado cu antecedentnan penal cu ta traha
den gobierno.
Esaki no ta solamente tocante casonan individual, sino mas tocante e confianza den gobierno. Si
reglanan ta wordo aplica na forma transparente y consecuente, esaki por yuda pa fortifica e
confianza aki y mustra na nos generacion nobo cu integridad y profesionalismo lo keda norma
den e liderato di nos pais.
