Prome Mininister Eman ta manipula

Partido MEP:
MEP NO A HIBA UN MANEHO DI AUMENTA BELASTING
ORANJESTAD – Prome Minister Mike Eman a manipula y papia mentira den su discurso den
Parlamento e siman aki, cu ta algo hopi lamentabel. Enbes di reconoce e bon trabou cu MEP a
haci pa recupera e finansas y credibilidad fiscal di Aruba despues di dos crisis, Eman durante su
discurso den e reunion di Parlamento a scoge pa purba scapa su cara manipulando e realidad.
Prome Minister Eman a cuestiona entre otro, cu gobierno di MEP lo a hiba un maneho di subi
belasting durante 7 pa 8 aña. Esaki no ta cuadra cu e berdad ya cu MEP no a hiba un maneho di
subi belasting durante 7 pa 8 aña. Si tabata tin belasting cu a subi tabata pa e consecuencianan
di e prome crisis: e mega debe cu Gobierno di MEP a hereda di Mike Eman na aña 2017, te cu
Aruba a haya un KB di Hulanda gobernando kraanchi habri, un curatela financiero.
E consecuencianan di e di dos crisis ta pa motibo di e prestamo urgente cu mester a haci na
Hulanda y bou di “condicion y presion”. Nos a subi productividad y entrada di Aruba y cobra
esnan cu no tabata pagando impuesto.
Un pais no por sigui fia pa paga su mesun debe y su interes; nos tin cu produci pa paga. Ni
Hulanda ni cualkier otro pais no por permiti nan mes cay den ciclo di fia pa paga debe y interes.
Ta danki na e maneho corecto y responsabel cu curashi hiba pa MEP, Aruba a recupera su
credibilidad y stabilidad financiero cu awe nos tin surplus. Tanto IMF, CAFT y Gobierno di
Hulanda a reconoce y felicita Aruba. Si nos a sigui e maneho di AVP di fia pa paga debe, awe
Aruba lo a kibra, awe Aruba lo a haya un otro KB y ken sa cu nos Status Aparte lo ta na peliger.