Minister di Turismo mr. Wendrick Cicilia: E momento pa balansa turismo y calidad di bida ta awo

Den apenas algun siman den funcion di Minister di Turismo, Transporte y Labor, mr. Wendrick Cicilia tabatin un sonrisa grandi riba su cara, sinta memey di Aruba Tourism Authority y CEDE Aruba, pa anuncia un aliansa strategico den cual lo promove un miho calidad di bida bao di nos ciudadanonan. “Porfin tin un gobierno nobo cu a opta pa no sigui traha riba cantidad, sino mas calidad mara na miho calidad di bida di e empleadonan y di comunidad”, asina Minister mr. Wendrick Cicilia a anuncia durante su discurso.

E mandatario, cu ta determina e maneho di turismo riba nos pais, a felicita ambos entidad pa tur nan esfuerzo hinca den e proyecto aki. E no ta un campaña pa trece mas turista pa Aruba, sino mas bien pa envolvi e turista den esufersona di “duna bek na comunidad”. ATA no mucho dia pasa a lansa un campaña internacional den cual ta promove e idea cu si como turista bo trata Aruba bon, cu Aruba lo trata bo bon bek. Ta referi na esfuersonan boluntario pa cuida nos naturalesa, nos rikesanan natural y sigura miho calidad di bida pa nos hobennan, adulto y adulto mayornan.

“Hopi biaha ta tende di aloca fondo solamente na promocion internacional. Pero aki por bira con nos ta bolter cos”, segun e mandatario a splica cu un sonrisa riba su cara. E ta referi na e cambio di pensamento cu ta bibando awendia den maneho di turismo, den cual cantidad no ta importante mas, sino calidad y cu e pueblo ta biba miho. “Nos kier mira e sonrisa riba cara di nos hendenan. Nos kier pa nan ta orguyoso di ta biba y traha aki. Pero tambe mi kier mira e turista orguyoso di ta bin Aruba, pasobra e isla ta dun’e bek, ta trat’e bon y cu nos naturalesa ta brasa y aprecia nan bishita”, asina Minister Wendrick Cicilia a subraya.

E mandatario a keda masha contento di tende cu Aruba Tourism Authority a aloca mey miyon florin pa sostene CEDE Aruba, pa un lista di programanan social y recreativo pa comunidad. Den esaki a tene cuenta cu hobennan y adultonan, tur den un esfuerso pa mehora calidad di bida. E bon ta cu e acuerdo aki ta encera dos aña di sosten financiero pa garantisa continuacion. Pa e siguiente temponan nos dilanti e enfoke ta bay keda riba mehora calidad di bida y un balansa entre turismo, medio ambiente y calidad di bida.