EVELYN WEVER-CROES TA FELICITA SUE-ANN LEE CU SU NOMBRAMENTO COMO RECTOR NOBO DI UNIVERSIDAD DI ARUBA

ORANJESTAD, 12 SEPTEMBER 2025 – Cu hopi orguyo, Parlamentario y ex-prome minister Evelyn Wever-Croes ta felicita señora Sue-Ann Lee cu su nombramento como rector nobo di Universidad di Aruba.

“Nos ta sinti nos sumamente honra cu un yui di tera ta tuma e papel importante aki. E hecho tambe cu e ta un hende muher, ta duna nos un motibo mas pa ta orguyoso,” asina Wever-Croes a bisa. “Mi ta desea sra Lee exito y sabiduria den guia di nos universidad pa un futuro yena di oportunidad y desaroyo pa nos studiantenan y nos pais.”

Cu e nombramento di Sue-Ann Lee, Aruba ta tuma un paso nobo den fortalecemento di liderazgo local y ta stimula otro role model pa generacionnan cu ta bin.

“Ora hende muhernan ta asumi posicion di liderazgo, nan ta trece balansa, vision y curashi. Esaki ta precisamente e tipo di liderazgo cu ta yuda nos comunidad bai pa dilanti.”