AVP ta scoge pa responsabilidad y futuro: no pa miedo y division

ORANJESTAD (14 di september 2025) – Aruba no lo perde su autonomia. Den e ultimo
simannan pueblo por a tuma nota di conmocion grandi riba e topico di Rijkswet.
Opositornan ta purbando di malinforma y inculca miedo den pueblo. Nan ta haciendo
todo lo posibel pa acusa gobierno actual pa asina sconde nan propio fayo.
Un herencia di mal maneho. E Rijkswet ta riba mesa a consecuencia di mal maneho y di incumplimento cu acuerdonan den e periodo di gobernacion 2017–2024. Den e periodo ey, ex-premier
Evelyn Wever-Croes y su gobiernonan di MEP ta esunnan culpabel di haci varios
maniobra straño y scogencianan motiva pa score politicamente.
Parlamentario Kelly tas plica cu na momento cu parlamentarionan di MEP a bay cambia
e articulonan den e LAFT, pero no a keda cla cu nan mesun ley, Hulanda a cuminsa
desconfia di Aruba. Esaki a afecta grandemente Aruba su reputacion como un partner
confiabel den Reino.
Despues cu gobierno di MEP no a bin cla cu palabracionnan pa cu e fiansa di Covid,
den e tempo stipula cu Hulanda, esaki a empeora e relacion y a provoca Hulanda pa
bin cu e alternativa di un Rijkswet. Si gobierno di MEP a cumpli cu nan responsabilidad
desde 2017, awe pueblo di Aruba lo no ta pagando e consecuencianan di un estilo di
gobernacion desastroso, cu MEP a hiba. Realidad tras di e Rijkswet
Despues di a ricibi autorizacion den su conseho di minister, ex-premier di Aruba a firma
un acuerdo gubernamental cu a mara su mes, su gabinete, pero tambe tur futuro
gobierno di Aruba na un Rijkswet.
Ora pueblo a scoge un gobierno nobo, e proceso di negociacion a continua bao di
gobierno AVP-FUTURO y e concepto a ser entrega na parlamento di Aruba. E proceso
legal no a cambia y no tin nada secreto. Awor e concepto ta den e parti di e
internetconsultatie, despues e ta bay pa comisionnan di conseho pa despues trat’e den
Parlamento di Aruba. Si parlamento ta di acuerdo, e ley por bay bek na gobierno y

despues na Tweede Kamer na Hulanda. Tur cos ta pasa den forma legal y
transparente; ningun cos ta ‘scondi’.
Generacion nobo, rumbo nobo Parlamentario Dennerich Kelly ta sigura cu AVP – den particular e generacion hoben den politica – ta tuma nan responsabilidad como representante di pueblo den
parlamento na serio. Nos ta para pa responsabilidad y integridad. Nos ta analisando y
haciendo preguntanan al caso y sigur lo sa di defende interes di nos pueblo, pero
tambe e lucha di nos antepasadonan.
Fraccion di AVP a compronde e señal di e pueblo votador y p’esey nos no ta scoge pa
cay den weganan di oposicin. Nos ta consciente cu e politica di bay ofende, grita,
instiga y practica politica di pelea y division, no ta hiba Aruba dilanti. Nos ta trahando cu
seriedad y dignidad riba solucionnan cu ta fortalece e futuro di Aruba completo.
Un futuro di speransa “Loke Aruba mester awor ta politica basa riba ideologia relevante, responsabel y di
confiansa. Nos no por continua cu politica di manipilacion, división y pelea. P’esey ami,
hunto cu fraccion di AVP, ta scoge un caminda di responsabilidad, cu ta hiba Aruba na
stabilidad y siguridad pa e futuro generacionnan,” asina Parlamentario Kelly ta afirma.
E Rijkswet ta un marco pa stabilidad financiero confiabel y ta duna Aruba un base
solido den futuro cercano. “Durante tratamento di e rijkswet den parlamento,
siguramente ami y e fraccion di AVP lo sa di defende interes di pueblo,” e ta añadi. “Mi
ta convenci cu responsabilidad, integridad y cooperacion, Aruba lo sali mas fuerte for di
e proceso aki. Pueblo por ta trankil pasobra mi t’ey pa bo. Mi compromiso ta cu bo.”