Otmar Oduber (PPA): PPA ta bin cu alternativa pa evita HOFA
Den henter e discusion tocante rijkswet: HOFA, fraccion di PPA ta kere cu mester traha riba e solucionnan realistico y strategico y no keda pega den un pelea politico, cu no ta na bienester general di pueblo. Otmar Oduber, como lider di fraccion di PPA, ta expresa cu e direccion cu PPA ta boga p’e ta, pa tin un frente nacional, unda Aruba mes ta asumi su compromiso pa defende su autonomia, responsabilidad y sostenibilidad.
Stop proceso di HOFA y respeta acuerdo di IPKO 2022
PPA ta pidi pa para e proceso di HOFA y bolbe na mesa como Parlamento y Gobierno. Esaki ta basa riba e palabracionnan haci den IPKO na 2022 firma pa e parlamentarionan mes, unda ta informa, involucra, haya sosten y mandato di Parlamento prome cu presenta un Rijkswet. E palabracion aki ta traha pa respeta democracia y autoridad di Parlamamento di cada pais den Reino. Di e forma aki cada pais den Reino por eherce nan posicion igual, segun Statuto di Reino.
Dialogo pa fortalece Constitucion
Aruba mester busca consenso cerca tur fraccion, pa pone un ‘begrotingskamer’ den nos propio Constitucion. Esaki ta duna un garantia local y duradero pa hiba un control financiero, sin tin mester di depende di mecanismo excesivo imponi for di Den Haag. E ‘begrotingskamer’ tin un rol di control, unda por fortifica e checks & balances interno di nos pais y semper lo tin mester di 2/3 parti di bo Parlamento pa haci cambio. Pues un gobierno den su mayoria, nunca lo por haci cambio riba su mes.
Reduci gasto di gobierno
Un otro alternativa cu fraccion di PPA ta propone ta, pa cuminsa cu 0.5% di reduccion structural den gasto di gobierno, cu e meta pa amplia esaki den un forma gradual. E cifra di 0.5% ta representa e diferencia di reduccion di e porcentahe di interes, pues di 6.9% pa 3.5%, di e prestamo cu Aruba a haya for di Hulande den e periodo di pandemia. Esaki lo conduci pa nos por bay den un direccion mas duradero pa yega na un maneho financiero responsabel, baha nos debenan y keda cu mas placa cu por inverti den nos economia. Reduccion di e gastonan ta e.o. door di elimina, independisa of privatisa cierto departamento di gobierno. Aruba lo spaar placa, lo elimina burocracia y optimalisa e servicionan, door cu nan lo por opera independientemente.
Refinanciamento cu interes mas abou
Aruba a demostra cu e por logra un surplus den su presupuesto, door di hiba un maneho financiero responsabel y cu un base economico mas solido. PPA ta propone pa uza e formula aki pa refinancia nos debenan na un interes mas abou, manera cu Corsou tin e. Esaki lo duna un alivio na tur cu ta biba riba e isla aki, sin tin mester di depende na e condicionnan desbentahoso cu ta drenta cu HOFA.
Pa conclui fraccion di PPA ta propone e cuater alternativanan aki y ta boga pa tur partido pone interes politico un banda y pone interes di pais Aruba specialmente nos derecho di autodeterminacion cu nos grandinan a lucha tanto p’e na prome lugar. Conhuntamento por fiha un rumbo basa riba autonomia y responsabilidad. Ta momento pa demostra liderazgo real cu ta refleha stabilidad, confiansa y progreso pa pueblo di Aruba.