Pa Evelyn Wever-Croes, ex Minister President Opinion: Nombracion politico, di fotografo pa consehero. Unda integridad a keda?

ORANJESTAD – Durante e eleccion ultimo, partido Futuro a haci hopi promesa fuerte cu nan lo ta otro. Profesionalisacion di e aparato gubernamental, Transparencia den nombramento, No mas “friends & family”, sino solicitud habri y oportunidad igual pa tur hende. Pa hopi 7351 persona, esey tabata un biento fresco. Pero e realidad, lamentablemente, ta net contrario.

Mi a ricibi informacion cu candidato # 7 riba e lista di Futuro, fotografo den e gabinete anterior pa Minister Geoffrey Wever, a wordo nombra sin ningun solicitud habri como consehero na ministerio di Minister Gerlien Croes, ambos ta minister pa partido Futuro. E mesun hende, cu mesun background, sin ningun formacion adicional of experiencia relevante, ta wordo promovi directamente pa un funcion cu mas responsabilidad y un salario mas halto. Esaki no ta redo, esaki ta realidad.

Pa esey, mi a haci pregunta formal na tanto Minister Gerlien Croes como Minister Arthur Dowers, cu ta responsabel pa asunto di personal. Mi kier sa a base di kico e nombramento aki a tuma luga, y si e posicion a wordo habri pa aplicacion publico. Si Departamento di Recurso Humano a duna conseho, y si nan conseho tabata positivo. Y mas importante: si esaki ta cuadra cu e promesanan cu Futuro a haci den campaña. Pasobra con nos por pidi confiansa di pueblo, si nos mes ta kibrando e regla cu nos a compromete pa sigui!

Tur partido politico cu ta tuma nan mes serio sa: bo credibilidad ta bo capital mas importante. Si bo ta lucha contra nepotismo, bo no por privilegia bo propio hendenan sin duna transparencia. Esaki no ta afecta solamente bo partido, pero tambe e confiansa den nos democracia.

E caso aki no ta solamente tocante un persona. E ta tocante algo hopi mas profundo: integridad di gobernacion. Hende hoben, profesional y hende cu tin ideal, ta perde confiansa ora nan mira cu lealtad politico tin mas balor cu preparacion, habilidad y competencia. Aruba merece hopi mas cu esey. Aruba merece transparencia, honrades y lidernan cu ta cumpli cu nan palabra.

Mi ta haci un yamado na Minister Croes pa, den cuadro di transparencia, duna claridad total riba e nombramento aki. Y mi ta spera cu Minister Dowers lo tuma su responsabilidad como vigilante di bon maneho di personal. Si nos di berdad kier construi un Aruba mas fuerte y husto, nos mester cuminsa cu cumpli cu nos mesun principionan.