Minister Wendrick Cicilia a discuti oportunidadnan pa Aruba cu Embahador di Reino

Minister di Turismo, Labor y Transporte, mr. Wendrick Cicilia a bishita Embahada di Reino Hulandes na Bogota, Colombia y a reuni cu e embahador. A toca varios tema, specialmente e conexion diplomatico entre Reino Hulandes y Colombia, cu pronto lo cumpli 200 aña.

E bishita aki a enfoca riba con e relacionnan diplomatico ta habri portanan pa Aruba. E minister a enfatisa cu e contactonan di e embahada ta esencial pa avansa logronan grandi, manera aumento di vuelonan pa Aruba. Recientemente, Latam Airlines a cuminsa cu vuelonan directo for di Peru, cu ta un ehempel di e tipo di cooperacion aki.

Tambe a reuni tocante:

* Turismo y Economia: E importancia di e mercado Latino Americano pa Aruba y e necesidad pa diversifica nos economia.

* Sostenibilidad y Calidad di Bida: E vision di Gabinete AVP-FUTURO pa mas energia renobabel y mehora calidad di bida y poder di compra pa e ciudadano di Aruba.

* Cooperacion Maritimo: Posibel cooperacion den e sector di waf, referiendo na e relacion cu Port of Amsterdam entre otro.

* Transicion Energetico: E rol di organisacionnan manera TNO den yuda Aruba cu su transicion energetico.

Minister mr. Wendrick Cicilia a splica cu e embahador a mustra un interes grandi den sostenibilidad y costo di bida, temanan cu ta alinea completamente cu e vision di gobierno.

Ademas, a discuti oportunidadnan pa importa productonan for di Colombia. Tanto e minister como e embahador a reafirma e importancia di e relacionnan fuerte aki pa Aruba y ta comprometi pa traha mas di cerca den futuro pa habri mas oportunidad pa nos pais.