Minister Wendrick Cicilia a topa cu Emirates
Encuentro yena di expectativa y deseo di ambos banda
Esaki no ta e prome encuentro di e delegacion di turismo di Aruba cu e aerolinea Emirates. A cuminsa explora e posibilidad, pa den futuro, por atrae vuelo di e aerolinea grandi aki di Medio Oriente pa nos isla. Nan semper a demostra cierto apetit, specialmente awo cu nan ta purba conkista e continente Americano.
Ehecutivonan di e aerolinea a delibera den pasado cu e delegacion di Aruba, aunke semper a keda falta e empuhe di parti di gobierno. Awel, pa prome biaha den ocho aña cu e Minister di Turismo ta bishita Colombia y a probecha pa continua cu e reunionnan cu Emirates y a nota mesora cu presencia di e mandatario ta duna un otro dimension na e combersacionnan y intencionnan.
“Mi a keda hopi contento cu e interes y tempo cu a brinda e delegacion di Aruba y entusiasmo mustra di parti di e ehecutivonan di e aerolinea. Aruba ta un opcion atractivo, pa destinacionnan cu lo ta nobo pa nos region. Actualmente Emirates no tin vuelo pa Caribe. Ta trata aki di un mercado di pasaheronan cu un entrada anual halto, capaz pa crece nos mercado di turismo di balor halto pa Aruba”, asina Minister di Turismo, Labor y Transporte, mr. Wendrick Cicilia a bisa na final di e reunion na oficina di Emirates na Bogota, Colombia. “Strategia di Aruba di diversifica e base di mercadonan lo ta sirbi di un manera historico cu un opcion asina’ki cu ta mustrando hopi factibel”.
Den e reunion tabata presente Gianmarco Mazzetti, Area Country Manager y tambe Hugo Baddia, Director Airport Operations El Dorado Colombia. E delegacion di Aruba a conta tambe cu Philippe LaReina, Chief of Staff di Ministerio di Turismo, Labor y Transporte, hunto cu Jo-Anne Arends, Aviation Business Development Executive na Aruba Airport Authority, compaña pa Ronella Croes, CEO di Aruba Tourism Authority, Sanju Daryanani, CMO di Aruba Tourism Authority y Jordan Schlipken-Croes, director di Aruba Tourism Authority pa e region di Latino America.
E delegacion di Aruba a acorda cu Emirates cu e reunionnan lo continua y cu lo manda informacion adicional cu e aerolinea a pidi. Nan a sigura e delegacion cu Emirates tin plannan grandi di expansion pa cu e continente Americano, pues tanto e parti nort, centro y zuid, ta nan prioridad. Claro cu por acepta un avion grandi asina ta bin cu retonan infrastructural, pero nada cu Aruba no por maneha.
Ainda no por papia di pa ki tempo, pasobra, manera ta conoci, e procesonan aki ta exploracion y negosacion cu ta tuma su tempo. Pero por lo menos por confirma cu tin combersacion y tin interes di ambos banda pa sigui explora.
Tocante Emirates
Emirates ta e di dos aerolinea di Emiratonan Arabe Uni, banda di Etihad Airways, estableci na Garhoud, Dubai y ta un subsidiario di The Emirates Group, propiedad di e gobierno di Dubai. E ta e compania di aviacion di mas grandi den Medio Oriente, operando mas di 3.600 vuelo pa siman for di su centro na Terminal 3 di Aeropuerto Internacional di Dubai. E ta operá den mas cu 150 ciudad den 80 pais den seis continente riba su flota di casi 250 avion. Operacionnan di carga ta haci pa Emirates SkyCargo. Emirates ta e di tres aerolinea di mas grandi na mundo. E ta tambe e di dos mas grandi den e segmento di carga.
Ahmed bin Saeed Al Maktoum a funda Emirates dia 15 di maart 1985, cu respaldo di e famia real di Dubai. Su prome dos avionnan tabata suministra pa Pakistan International Airlines. Cu 10 miyon Dollar Mericano na capital di inicio, tabata necesario pa opera independientemente di subsidio di gobierno.
Emirates ta opera un flota mixto di avionnan wide body di Airbus y Boeing. Te cu januari 2025, Emirates ta e operada di Airbus A380 mas grandi na mundo cu 116 avion den servicio. Emirates tambe ta e operado di Boeing 777 mas grandi di mundo cu 133 avion den servicio.
E compania tin un entrada anual di mas o menos 35 biyon Dollar Americano y tin no menos di 70 mil empleado den servicio directo di e aerolinea.
