Golden Age Expo 2025: Bienestar, conexion y inspirashon pa nos 60+

ORANJESTAD (2 di september 2025) – Comunidad di Aruba ta invita cordialmente tur
adulto mayor, nan famia, cuidado y profesional den area di salud y estilo di bida pa uni
na e Golden Age Expo 2025, un punto di encuentro di un dia totalmente dedica na
bienestar y pa empodera nos hendenan 60+. E evento lo tuma luga diasabra awo 6 di
september 2025, for di 8:00am te 2:00pm, na Hilton Aruba Caribbean Resort & Casino
na Palm Beach.
Golden Age Expo ta un plataforma cu ta hala atencion riba actividad fisico, nutricion,
conexion social, plan di pension y independencia den bida di adulto mayor. Tur esaki lo
tuma e forma di standnan informativo, screeningnan di salud, workshopnan di estilo di
bida y momentonan di entretenimento—cu e fin cu cada bishitante por sali cu
conocemento practico y inspiracion pa un bida mas activo.
Entre e participantenan confirma por menciona Cas Marie, Compra, Cruz Cora,
Hospital, CEDE y Buurtzorg, Sausalito Café Aruba, entre hopi otro. E mensahe di fondo
ta cla: bo proximo capitulo por cuminsa aki mes, den un ambiente cordial y accesibel pa
tur hende. FCCA (Fundacion Cas pa Comunidad Aruba) lo t’ey pa brinda orientacion y
informacion riba vivienda y otro servicionan relevante pa adulto mayor.
Esaki ta fortalece e mision di e evento pa conecta persona di cualkier edad cu recurso
practico y apoyo real, mientras ta enfatisa dignidad y autonomia den tur etapa di bida.
Por cumpra entrada adelanta na stacion di Citgo Essoville pariba di Brug, Palm Beach
na Noord y Boulevard na Playa.
Pa adulto mayor, e expo ta ofrece inspiracion y herment pa keda activo; pa famia y
cuidadrnan, ta un opcion unico pa papia cara a cara cu experto y organisacion local; y
pa profesionalnan di salud y bienestar, ta un oportunidad pa hiba conocemento nobo
bek pa nan clientela. Un bishita cortico por cambia un habito, y un habito por cambia un
bida—e Golden Age Expo ta crea precies pa esaki.
Pon’e den bo agenda pa diasabra mainta: un ora di bo tempo por habri henter un
mundo di oportunidad pa bo, bo mayornan of suegronan y tur dushi adulto mayor. Nos
ta warda bo na Hilton Aruba, pa biba den bienestar, conexion y alegria e añanan di e
tercer edad. Pa mas informacion y pa un preview bishita e pagina di Facebook: Golden
Age Expo.