Respetando e pasado creando un futuro Restauracion di Monumento di Piscado Perdi ta den su fase final

Restauracion di Monumento di Piscado Perdi tumando luga pa algun siman caba y cada dia ta mas cerca di un ceremonia di desvelo oficial. E monumento aki, pa hopi ta nifica un luga caminda por yega y recorda nan ser keri cu a subi lama y nunca mas a regresa, y cual nunca a haya un despedida of entiero oficial. Apenas algun siman pasa Minister mr. Wendrick Cicilia a reuni cu algun famia di e piscadornan perdi pa anuncia cu lo inicia trabounan.

Un monumento asina aki ta e recuerdo bibo di cu un dia e piscado ey, cu e balentia y responsabilidad di cria y lanta su famia, ta subi lama pa trece pisca aden y pone cuminda riba mesa, nunca mas a bolbe.

Giovanny Villamizar kende ta encarga pa ehectura proyecto y manehonan pa Minister di Turismo, Transporte y Labor, mr. Wendrick Cicilia a remarca cu ta trata di diestres aña cu e monumento aki ta den abandono total. Nunca a restaura esaki y e decadencia tabata indiscutibel. Awor den un tempo record ta logra ehecuta e trabounan di restauracion necesario. E nombernan di cada Piscado Perdi ta di gran balor y ta di lamenta cu e monumento aki tabata den asina mal estado.

Pa famia e tabata sumamente dificil di mira e estado cu e tabata aden. Te asta no tabata mira su balor mas como monumento. Vandalismo y deterioro a caba cu gran parti di dje. Mesora a pone prioridad riba e restauracion y e honor bek di e monumento aki.

Dedica na tur cu no a regresa, nombernan cu ta aparece y cu pa cada famia ta di sentimento profundo. Emocion halto y cu lagrima na wowo, algun familiar a conta con importante e ta pa nan cu e monumento aki ta existi, y cu di un forma of otro ta bira un graf caminda por bishita y recorda nan ser keri.

Pa locual ta trata e restauracion di e monumento a reuni den contacto estrecho cu Fernando Vermeer y Gilbert Senchi cu ta esnan cu a desaroya e obra pa mantene lo mas cu por elementonan di e obra intacto. Tambe tin colaboracion di Santa Rosa cu ta esnan cu ta carga e registro oficial di e piscadonan perdi. Un total di 42 nomber registra y cu ta aparece riba e monumento. Den contacto estrecho cu ministerio tambe tin Hadicurari y conhuntamente ta trahando riba e restauracion completo di e monumento.

E iniciativa di Minister mr. Wendrick Cicilia pa cu e restauracion a keda sumamente aprecia pa e famianan di e piscadonan, como tambe di e artistanan cu a diseña e monumento. A tuma diestres aña pa haya e atencion y e boluntad pa su restauracion.

Giovanny Villamizar a remarca cu algun detaye di e monumento ta e cordinada maritimo alinea cu e compas. Material di marmer, brons y pintura special ta inclui pa asina perserva mas cu ta posibel e monumento pa evita cu e frustia. Locual cu tambe tin cu bay evita ta e vandalismo na e monumento. Tin diferente piesa cu ta di material costoso, pero cu nificacion valioso na e monumento entre otro e hanzue cu ta ekipo di trabou di un piscado.

E compas ta descalibra pero toch ta cuadra; tin su coordinadanan y e haak ta hancra den dje. Simbolicamente, pa mustra e forsa y significado profundo di e monumento. Pronto lo mira e finalisacion di e restauracion, pa sina por invita tur familiar di e Piscadonan Perdi pa forma parti di e ceremonia di desvelo y rindi honor mereci un biaha mas na tur cu a bay sin despedi, pero cu semper ta keda recorda cu hopi amor y tristesa.