Aeropuerto di Aruba orguyosamente tabata anfitrion di: E reunionnan di Comision di Medio Ambiente y Sostenibilidad y Siguridad di ACI-LAC 2025
ORANJESTAD – Aruba Airport Authority N.V. (AAA) orguyosamente a organisa e reunionnan anual di Comision di Medio Ambiente y Sostenibilidad y Siguridad di e aña aki di e Airports Council International (ACI) di e region di Latino America y Caribe (LAC) di 1 pa 3 di september 2025.
E Comision di Medio Ambiente y Sostenibilidad di ACI-LAC ta e grupo di trahado responsabel pa desaroya posicionnan colectivo di aeropuerto riba e asuntonan relaciona cu e maneho di medio ambiente y sostenibilidad di e industria di aeropuerto y ta promove y destaca continuamente e miho practicanan den maneho di medio ambiente.
E Facilitation, Security & IT Committee di ACI-LAC ta enfoca riba curasha e aeropuertonan pa sigui implementa tecnologianan nobo y miho practicanan cu ta mehora e procesonan, fluhonan y accesibilidad, cu e meta pa continuamente promove medidanan di siguridad basa riba nan contexto di riesgo actual.
Mas cu 50 miembro di e comision di Mexico, Costa Rica, Republica Dominicana, Peru, Colombia, Panama, Ecuador, Bogota, Argentina, Brasil, Corsou, Hulanda, Belgica, Grecia y Aruba a ricibi un caluroso bonbini riba dialuna 1 di september 2025, cu un evento ‘Taste of Aruba’, caminda nan por a disfruta di musica, cuminda local y bebida como tambe tabatin bendedonan local cu productonan traha na man disponibel. E reunion di e Comision di Medio Ambiente y Sostenibilidad di e aña aki a enfoca riba un caminda gradual pa circularidad, biodiversidad, adaptacion na cambio di clima, maneho internacional di desperdicio y tayernan pa e programa di Airport Carbon Accreditation y tambe Resiliencia di Aeropuerto y Adaptacion na Cambio di Clima. E reunion di e comision di Facilitation, Security & IT a cubri topiconan manera prueba di ekipo di siguridad, concepto di terminal mixto, transformacion digital den maneho di siguridad di AVSEC y ultimo desaroyonan tecnologico den diferente aeropuerto.
“Nos ta sumamente honra di tabata e anfitrion oficial pa e reunion di Comision di Medio Ambiente y Sostenibilidad di e aña aki ya cu e ta un oportunidad importante pa papia tocante desaroyonan, medidanan y oportunidasnan relaciona cu medio ambiente regional, nacional y tambe internacional”, asina Christine Kaarsbaan-Leo, Sustainability & Health Manager na AAA y Vice Presidente di ACI-LAC a expresa.
Angeline Flemming, Director Health and Sustainability na AAA y Director di Hunta di ACI-LAC a declara cu: “ACI-LAC ta provee e aeropuertonan miembro cu un plataforma importante pa intercambia conocemento, comparti miho practicanan y crea oportunidadnan pa colaboracion.”
Tocante Aeropuerto di Aruba
AUA Airport ta un di e aeropuertonan mas ocupa den region Caribe, cu mas di 24 diferente aerolinea operando na Aruba contribuyendo na mas cu 3.2 miyon pasahero pa aña y brindando servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 75% ta di Merca y Canada, 17% ta di Latino America, 4% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta sosode na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.
Fecha: 5 di september, 2025
