Parlamentario Xiomara Maduro: MINISTER WEVER TA LAGA AVP PONE WEB Y ELMAR NA RIESGO DI DEFAULT

Pueblo lo mester paga prijs halto pa su negligencia;

ORANJESTAD – Parlamentario Xiomara Maduro ta preocupa pa e manera iresponsabel cu e gobierno di AVP-FUTURO ta trata cu e companianan di utilidad di pueblo: Utilities, WEB y ELMAR. Sin sigui regla di good corporate governance, AVP ta nombrando comisario nobo den hunta di supervision di e companianan estatal sin aprobacion di lenders, locual ta pone e empresanan estatal na riesgo di default.

Cada bes cu un miembro nobo di un board di un compania estatal wordo apunta of un miembro wordo kita of reemplaza pa otro, lenders cu ta fia e compania estatal placa of ta para garantia pa inversionnan grandi, mester duna aprobacion prome. Locual ta pasando awo ta cu AVP ta bezig ta haci deshaci y contra di tur regla di bon gobernacion ta kita y nombra comisarionan nobo. E manera aki di traha sigur no lo por conta cu e aprobacion di lenders. Den un situacion asina lenders ta pone e companianan den default, locual ta trece cune consecuencia financiero grave manera: multa, interes mas halto, y falta di fiansa of garantia pa financia inversionnan crucial pa suministro di awa y coriente.

Como unico shareholder, ta responsabilidad di e gobierno, y principalmente di Minister Wever di Finansa, pa proteha interes di pueblo y percura cu e companianan estatal ta cumpli cu reglanan di good corporate governance. Sinembargo Parlamentario Maduro ta mira cu Minister Wever ta scohe pa keda keto, mientras cu AVP ta cambia huntq di comisario contra tur regla di bon gobernacion y hasta ta nombra algun hende cu tin pasado cuestionabel y sin e integridad necesario pa cuida patrimonio di pueblo.

Pa colmo, mientras e situacion ta desaroya y ta bira mas penoso, Minister Wever ta scohe pa djies bira cara y tuma un luna di vakantie, algo cu Parlamentario Maduro ta yama “un negligencia grandi” di un minister di finansa den tempo critico unda riesgo financiero ta loer.

Parlamentario Maduro ta pidi accion inmediato di Minister di Finansa Wever pa den tur transparencia y cu respet pa bon gobernacion, evita cu pueblo Arubano mester bay paga e prijs halto di decisionnan politico iresponsabel di AVP cu no ta na bienestar di Aruba.