Minister di Infrastructura, Rene Herde: “Mata ta cuminsa chikito, pero tin impacto grandi – y nos lo sigui cu infrastructura cu ta sostene crecemento”

Na ocasion di e lansamento oficial di e Proyecto di Reforestacion di Aruba, e recien apunta Minister di Infrastructura, drs. Rene Herdé, a duna su prome discurso como minister na e publico presente cu un mensahe di humildad y determinacion. E proyecto ambicioso ta busca pa, hunto cu 27 organisacion partner y e comunidad Arubano henter, planta 100 mil mata den 4 aña.

“E rotonde aki por parce chikito, pero ta laga nos pensa riba con tur mata grandi a cuminsa un dia, chikito. Asina mes nos por wak e proyecto di reforestacion: un simia chikito cu por bira un legado duradero,” Minister Herdé a bisa. El a agrega cu e impacto di e proyecto ta bay mas leu cu simplemente estetica. Ta trata aki di mehora nos temperatura, fortifica nos tera, proteha nos awa di suela y fortalece nos medio ambiente.

Minister Herdé a enfatisa cu bou di e Ministerio di Infrastructura, e rol no ta limita na asina yama “trabao tecnico”, sino un rol sostenedo y facilitado di e mesun tipo di proyecto. “E departamentonan cu ta forma parti di nos ministerio: cuido di caminda, drenahe, mantencion di espacio publico y planificacion urbano, ta esunnan cu lo crea e condicion pa e matanan crece y pa e proyecto realmente florece.”

Minister Herdé a subraya cu pa logra e meta di 100 mil mata, mester un infrastructura bon planea: “nos lo tin cu prepara e espacionan, coordina cu e sectornan relevante y traha mantencion continuo,” Minister Herde a expresa.

E mandatario a expresa su gratitud pa e liderazgo di Ministerio di Naturalesa y Medio Ambiente y tur e organisacionnan cu a uni den e movemento aki. “Mi tin confiansa den esunnan cu a tuma e iniciativa. Mi trabou lo ta pa yuda e mata crece, no solamente den su raiz, pero den e structura cu lo mantene su crecemento.”

Minister Herdé a finalisa cu un yamada pa accion: “Mi ta gradici bosonan presencia y mi ta yama nos pueblo: ban planta mata, ban sosten’e, ban haci Aruba bira un isla mas berde y resistente.”