Parlamentario Dangui Oduber: Na e momentonan aki NO tin ningun motibo ni ningunhustificacion pa bay di acuerdo cu un rijkswet!

Diabierna awor lo tin un debate publico den Parlamento di Aruba pa debati riba e tema di
Rijkswet. Un Rijkswet ta un ley di reino cu ta kita e derecho di voto di e 21 miembronan di
Parlamento di Aruba. E palamentario cu bay di acuerdo cu un rijkswet ta bay di acuerdo pa
entrega autonomia di parlamento y entrega su derecho di voto den man di e 150 miembronan
di Tweede Kamer na Den Haag.
Desde aña 1986 nos ta un pais autonomo, nos ta un pais liber caminda nos tawata tin nos
libertad financiero. Esaki lamenteblemente danki na mal maneho financiero a cambia na aña
2014 cu introduccion di di e ley di supervision financiero y introduccion di CAft. Awe na aña
2025 nos ta discutiendo un rijkswet cu lo caba di entrega nos autonomia financiero den man
di Tweede Kamer.
E rijkswet cu ta discutiendo ta algo cu Hulanda a presenta aña 2020 durante e pandemia. E
pregunta principal na gobierno ta kico ta e necesidad na e momentonan aki pa bay di acuerdo
cu un rijkswet cu ta kita autonomia di nos parlamento.
Na e momentonan aki pais Aruba su finansas publico ta solido
Tin surplus di 500 miyon florin, no tin problema financiero. Nos ta cumpliendo cu e tur e
normanan financiero ancra den e ley di LAft. Nos tin control supervision financiero y nos
debe e baha considerablemente. Situacion y panorama despues di e pandemia a cambia
drasticamente kiermen ami no por compronde y pio acepta cu e gobierno aki kier kita mi
autoridad como miembro di Parlamento sabiendo cu no ta necesario.
Nos a nota cu Partido Futuro ta cla pa bende nos autonomia, cla pa bende nos Libertad pa un
sakito di placa y nos ta spera cu Partido AVP no dobla y bira un Partido entreguista manera
Partido Futuro. Partido AVP na varios ocasion a bisa cu nan ta CONTRA un rijkswet y awor
a yega ora di pone accion tras di palabranan!