Parlamentario John Hart: Parlatino ta ratifica importancia di control parlamentario den transicion di energia

ORANJESTAD (8 di juni 2025) – Parlamentario di AVP, John Hart, ta destaca cu e transicion di energia di un pais mester ta husto y su inversion merece claridad. Representacion di pueblo pa medio di Parlamento ta clave den tur esaki.

Durante e dialogo politico den juni 2025 na Parlatino, tocante Accion Climatico y transicion husto, a destaca den e sede permanente di energia y tambe durante panel discussions e importancia di e rol di un Parlamento di un pais pa por controla leynan y/of maneho di un gobierno den cuadro di transicion di energia, y tambe e importancia di participacion di un comunidad den cuadro di transicion di energia.

Durante e comision di energia cu Parlamentario Hart a forma parti di dje, a pone enfasis riba e aporte parlamentario den e cuadro di ley y tambe con por aproba presupuesto cu ta pone enfasis riba e accion climatico cu un transicion di energia husto.

Tabata un dialogo politico sumamente interesante caminda por conclui cu transicion di energia mester di leynan cu ta compaña e ritmo di innovacion. Control parlamentario pa transicion di energia ta sumamente importante pa un pais y mester tin un bon comunicacion entre gobierno, parlamento y e comunidad ora ta trata transicion di energia.

Lamentablemente, por conclui cu na Aruba esaki no ta e caso. Den e ultimo añanan no tabatin participacion di comunidad debido den e tema di transicion di energia, tampoco a activamente envolvi Parlamento di Aruba den asuntonan crucial y fundamental den transicion di energia manera Eagle LNG of Hydrogen Valley. Echo ta cu Aruba ta mara na man cu pia pa 20 aña na un contract cu Eagle LNG, pero e representacion di pueblo no tin ningun claridad riba esaki.

Parlamentario Hart a expresa su preocupacion serio den un yamada cla pa parlamento haya transparencia y claridad tocante e maneho di transicion energetico di Aruba.

“E congreso na Parlatino ta mustra un bes mas cu Parlamento tin un responsabilidad pa controla gobierno den e pasonan cu ta tuma den cuadro di transicion di energia. Tin un tempo pa tur cos bou di e solo aki y mi ta kere cu a yega e tempo pa e minister encarga cu energia, bin parlamento pa duna claridad riba e transicion di energia.”

E a dirigi un carta na Minister Arthur Dowers cu diferente pregunta y e peticion pa convoca un reunion, preferiblemente publico, pa pueblo scucha directamente kico ta pasando cu e traspaso den cuadro di transicion di energia.