Deklarashon pa Dia di Boneiru

Mi Boneiru stimá,

Awe, riba e Día di Boneiru, nos ta bini huntu pa honra no solamente e bunitesa di nos isla, pero tambe e forsa i resistensia di nos pueblo. E día aki ta pertenesé na tur Boneriano, na nos mayor ku a kuida, defende I mantene nos kultura, na nos hubentud ku ta karga nos soñonan pa dilanti, i na tur hende ku a entrega nan kurason na e isla ku nos ta yama nos kas.

Mi ta dirigi mi mes na boso, no solamente komo un yu di tera, pero tambe komo un hende ku a dediká su bida na e lucha pa dignidat, derecho i futuro di nos pueblo. Mi mes trajektoria a kuminsa den mundo bankario, kaminda mi a traha ku sifra i negoshi. Pero ora ku nos Islanan, Antia Hulandes, a wordu disolvé na 2010, mi a disidi ku mi no por keda indiferente i silensioso. Despues ku tur nos lidernan politiko I di sektor priva a bisa mi ku nada mas no por hasi, ami a ninga di asepta esey , I mi a skohe pa e kaminda difísil pa defende nos pueblo.

For di e dia ey te awe, huntu nos a konstrui un moveshon — via Fundashon Nos Kier Boneiru Bek, Bonaire Human Rights, via e protesta históriko di 222 nonstop, via nos referendum kaminda pueblo su bos a resona loud and clear, i via anjanan di lucha na Boneiru i den hopi otro paisnan lehano. E luchanan ey no tabata solamente di mi — tabata di nos tur, i nan ta keda komo testimonio di e boluntat I kompromiso firme di e pueblo  Boneriano.

Pero ami nunka no por a kana e kaminda aki ami so. Awe mi ke yama danki for di profundidad di mi kurason na e muhernan i hombernan balente ku a yuda mi den e lucha aki. Boso balentia a duna mi forsa ora anochinan tabata skur. Mi ke gradisí spesialmente mi mama i mi tata, ku a kria mi ku fe, disiplina, respet, dignidat i orguyoso di ta un Boneriano. I mi famia Finies i Christiaan, ku a keda mi base mi fundeshi. I na tur famianan di Boneiru — ku a sufri, a sakrifiká, pero ainda ta mantene fuerte — mi ta bisa: e lucha aki ta tantu di boso ku di ami. Sin boso sosten, mi no por a sigui kana I karga e mishon aki.

Awe, mientrastanto ku nos ta selebrá Dia di Boneiru, laga nos tene den mente ku Boneiru no ta solamente un isla den laman Karibe, pero ta e kurason di un pueblo ku un historia urguyoso i un futuro mas briante aún. Nos ta herederonan di e kurashi di nos ansestornan, ku a sufri hopi pero a resisti I a mantene nan dignidat. Nos ta bibu komo defensornan di un kultura, un idioma, i un forma di bida ku no por desparese.

E día aki no ta solamente pa selebrashon, pero tambe pa reflekshon. Reflekshon riba kon lew nos a yega, i determinashon pa sigui kana e kaminda ku tin nos dilanti. Nos sa ku tin hopi desafionan — ekonomiko, sosial, politiko i medio ambiente I mas. Pero ami tin fe den e resistensia di nos pueblo. Mi tin fe den e alma Boneriano.

Riba e Dia di Boneiru aki, di profundidat di mi kurason mi ke felisita tur Boneriano — si bo ta riba nos isla, ò si bo ta biba lew for di kas — e día aki ta di boso I di nos futuro generashonan. Un día pa halsa nos bandera na haltu, pa kanta nos kantikanan, pa papia nos Papiamentu ku orguyo, i pa mira otro den kara komo ruman i rumanan di un solo pueblo.

Laga nos selebrá ku alegria, pero tambe laga nos kompromete — pa sigui traha pa hustisia, pa igualdat, i pa e derecho di Boneiru pa para haltu entre e pueblonan di mundo.

Masha pabien pueblo Boneriano. Dios bendishona Boneiru. Feliz dia di Boneiru na tur.

James Finies