Fraccion AVP: Ningun cambio den cantidad di dia di siman laboral pa awo

ORANJESTAD (5 di september 2025) – Recientemente Parlamento di Aruba a pasa un
mocion cu ta referi na e tema di reduccion di cantidad di dianan di siman laboral.
Fraccion AVP ta kere cu ta importante pa informa pueblo cu e no ta trata di un ley y cu
ningun cambio den cantidad di dianan di siman laboral ta plania pa implementa di
biaha. En realidad e mocion aki ta simplemente manda un señal na Gobierno pa
cuminsa habri e dialogo cu gremionan tocante e modelo existente di orario semanal
riba e mercado laboral.
Mester keda cla cu un mocion no ta un ley. Un mocion cu ta pasa den Parlamento por
tin dos destino: Sea gobierno ta inclui e mocion den su maneho (beleid) of gobierno ta
haya un mandato pa prepara un concepto di ley. Den e caso aki, ta e di dos.
E intencion ta pa habri e discusion riba e posibilidad di algo asina pa Aruba den futuro.
Esey ta nifica cu hurista lo mester traha riba un caso completo cu ta inclui, entre otro,
best practices di otro paisnan y estudio di factibilidad prome cu un concepto concreto
por keda presenta. E proceso aki no ta simpel y lo por tuma su tempo hasta añanan –
prome cu un concepto yega Parlamento bek.
Despues, e concepto ta bay na Raad van Advies (RvA) pa evaluacion y consulta cu
stakeholders. RvA ta presenta recomendacion cu despues mester revisa pa gobierno,
cu por haci adaptacion segun nan consideracion. Solamente despues di tur e paso
largo aki, un propuestanan di ley por bay bek na Parlamento pa votacion, y si ta pasa, e
por bira ley oficial.
Esaki ta mustra cu no tin ni un fecha of plan concreto ainda pa implementacion. Ta
simplemente un deseo manifesta den Parlamento, inspira riba desaroyo na otro
paisnan, cu e bienestar y salud mental di trahadonan den mente. Sin embargo,
Fraccion AVP ta pone enfasis cu no tin cambio inmediato, pa cual no mester crea
confusion den pueblo ni alarma innecesario den mundo laboral.
AVP kier aclaria tambe cu e mocion aki no tin absolutamente nada di haci cu aumento
di salario minimo pa ora cu recientemente a keda aproba. Ta dos asunto totalmente
separa y un no tin relacion cu e otro. E ta mas bien un pensamento colectivo riba e
modelo existente den e mercado laboral.
AVP ta kere cu pueblo merece un informacion completamente honesto y transparante,
y nos ta sigui comprometi pa orienta comunidad den tur paso di e proceso.