Aruba Bank Walk & Run 2025 a culmina cu un donacion bunita na YMCA Aruba

Oranjestad, 30 di mei, 2025 – Aruba Bank Walk & Run a finalisa su 19 edicion cu hopi energia y participacion masal for di comunidad. Durante 4 dia, 2600 participante a core y cana riba diferente ruta, acumulando mas di 20 kilometer den ambiente pa yena nan metanan.

Aruba Bank ta dedica un parti di e ingreso for di registracion pa duna na un fundacion local cu ta haci un impacto positivo den nos comunidad. Pa 2025, nos ta orguyoso di a selecciona YMCA Aruba como recipiente di e donacion aki.

YMCA Aruba ta liderando un programa despues di skol dedica na mucha, ofresiendo un espasio sigur y educativo unda nan por desaroya nan talento, haci tarea y participa den actividadnan sportivo y creativo, mientras nan mayornan ta na trabao.

Edseline Leer, Head of Retail Banking y Roxanne Croes, Sr. Marketing Officer di Aruba Bank a bishita YMCA pa entrega e donacion oficialmente. Sra. Jennifer Caminata, directora di YMCA Aruba, conhuntamente cu Byanca Alvarado a expresa cu e donacion lo yuda fortifica e programa vacacional cu nan ta planiando. “Nos ta profundamente agradeci pa e apoyo financiero, pero mas importante aun, pa e reconosemento di e importansia di inversion den futuro di nos muchanan,” Sra. Caminata a expresa.

Aruba Bank ta honra di por yuda sosten e trabou valioso cu YMCA Aruba ta haci y ta compromete pa sigui inverti den bienestar di nos comunidad.