Aruba Bank cu un donacion di 100MIL florin na Aruba Conservation Foundation
Oranjestad, Aruba, 28 di mei, 2025 – Den celebracion di su 100 aña di sirbi su comunidad di Aruba, Aruba Bank ta orguyosamente anuncia su compromiso continuo cu sostenebilidad y bienestar di e isla.
Como parti di su “Legacy Project”, Aruba Bank a entrega un donacion significativo di AWG 100,000 na Aruba Conservation Foundation, pa apoya e transformacion di Hofi Shon Shoco na un espacio sostenibel y educativo.
“Ta un gran placer pa nos ta aki awe cu Aruba Conservation Foundation, un organizacion cu tin un rol importante den preservacion di nos naturalesa,” segun Aruba Bank.
“Den cuadro di nos celebracion di 100 aña, nos ta masha orguyoso di contribui na un proyecto cu ta pone enfoke riba educacion, conservacion, y bienestar pa futuro generacion.
” Asina Nataly Simmons-Thompson, Chief Strategy & Transformation Officer di Aruba Bank a comparti cu tur presente durante e bishita y entrega di e donacion.
E transformacion di Hofi Shon Shoco lo sirbi como un modelo di un hofi sostenibel, cu elemento educativo, restauracion ecologico y espacio pa comunidad. E meta ta pa crea un espacio no solamente pa proteha nos herencia natural, pero tambe inspira amor y respet pa naturalesa den nos comunidad.
Aruba Bank ta gradici Aruba Conservation Foundation pa nan pasion, dedicacion, y vision pa un Aruba mas berde y sostenibel. E donacion aki ta refleha Aruba Bank su compromiso continuo pa inverti den proyecto cu tin impacto positivo riba comunidad y medioambiente.
