PARTIDO MEP : FALTA DI LIDERASGO DI AVP TIN GOBERNACION MANCA

ARUBA MERECE MIHO

ORANJESTAD – Locual Aruba ta bibando, di tin un gobierno manca, secuestra pa un proceso di screening tin un nomber: MIKE EMAN. Su falta di liderasgo y miedo di enfrenta e berdad di su candidato Mike de Meza ta pone cu Aruba no tin minister di infrastructura ainda.

E falta di liderasgo y cobardia di Mike Eman tin henter e pais perhudica, y hasta a scohe pa sacrifica nos profesionalnan en bes di gara e toro na su cacho. Mike Eman ta prome minister y segun e ley di integridad di ministernan AB 2021 no 203 ta Mike Eman tin e ultimo palabra den caso di screening di Mike de Meza.

GERLIEN CROES NO TA CONFIA DESIREE CROES

Na comienso di formacion, Gerlien Croes tabata determina ken AVP por a pone of no.

Un ehempel ta e caso di señora Desiree Croes. Gerlien Croes no ta confia Desiree Croes y a prohibi AVP pa hasi Desiree Croes minister plenipotenciario na Hulanda. Esey a pone cu AVP mester a bai busca den e bahul di recuerdo, y a saca Baba Herde di e bahul. Pero debi na edad y estado di salud di Baba Herde, ainda e no por keda cla pa bai Hulanda.  Mientrastanto Aruba no tin un representante na Den Haag, hustamente den e momentonan crucial di negosiacion cu Hulanda. Tur esaki pasobra Gerlien Croes no ta confia AVP.

MIKE DE MEZA SU DESTINO TA DEN MAN DI MIKE EMAN

Ademas, e candidatura di Baba Herde a trece discordia interno bou e candidatonan hoben di AVP mirando cu e decision aki ta trece un sentido di desconfiansa den e habilidad di nan como hoben profesional pa ocupa cierto posicionnan. Pero den caso di Mike de Meza, Gerlien Croes a bisa caba cu e no tin problema, y cu e no tin nada mas di bisa. Kiermen: Mike de Meza su destino ta completamente den man di Mike Eman.