Minister di Turismo mr. Wendrick Cicilia orguyoso den logro grandi di Bucuti & Tara Beach Resort pa nos turismo
Bucuti & Tara Beach Resort reconoci como miho hotel den Caribe pa TripAdvisor
Dialuna mainta Prome Minister mr. Mike Eman hunto cu Minister di Turismo, Transporte y Labor mr. Wendrick Cicilia, a asisti na un celebracion importante pa Bucuti & Tara Beach Resort, caminda cu e ekipo di e resort, su empleadonan dedica y otro invitadonan special a celebra un logro historico: e reconocemento oficial di TripAdvisor cu Bucuti & Tara Beach Resort ta e miho hotel den Caribe y un di e cinco miho hotel rond mundo.
Minister Cicilia a expresa su orguyo y admiracion pa e resort y su ekipo, cual a demostra cu persistencia, pasion y excelencia den servicio por trece Aruba na un nivel global. Ademas Minister Cicilia a felicita Bucuti & Tara Beach Resort cu entusiasmo y hopi admiracion. Bucuti & Tara Beach Resort no ta e hotel mas grandi na Aruba, pero sin duda ta un lider den e mundo hotelero. E exito di nos industria turistico ta gran parti danki na e esfuersonan incansabel di esnan cu ta traha tur dia pa duna e huespednan un experiencia inolvidabel. “Aruba ta conoci pa su hospitalidad, pero tambe pa su actitud y su manera di pensa, e amor y felicidad cu nos ta carga den nos curason cu ta contagioso. Esaki, hunto cu balor y conviccion, ta keda na base di e exito di un hotel manera Bucuti & Tara Beach Resort”, segun Minister Cicilia.
Crescenzia Biemans, Chief Commercial Officer di Bucuti & Tara Beach Resort, a indica cu e logro di sali como number 1 hotel den Caribe entre 1.6 miyon hotel rond mundo ta un resultado di dedicacion incondicional. Bucuti & Tara Beach Resort ta un hotel independiente, cu apenas 104 camber, riba un isla chikito cu hopi biaha no ta ni parece riba mapa, pero cu a logra e reconocemento aki danki na esfuerso continuo, integridad y un proposito cla: pa sirbi nos huespednan, pero tambe pa beneficia nos comunidad.
E hecho cu un hotel local, maneha cu pasion y responsabilidad, por logra un reconocemento asina importante ta un mensahe di speransa y motivacion pa tur negociante y ciudadano. Ora bo pone bo alma den bo trabou, y bo meta ta pa lanta bo pais y comunidad, tur cos ta posibel.
Minister di Turismo, Transporte y Labor hunto cu Minister-President mr. Mike Eman den number di Gobierno di Aruba ta reconoce y aprecia e esfuerso social di Bucuti & Tara Beach Resort, no solamente como un empresa exitoso, pero como un miembro activo den comunidad. E resort a mustra su compromiso social, tanto den bienestar di su empleadonan como den e sostenibilidad di nos isla.
Cu hopi orguyo por wak un empresa Arubano lanta e bandera di nos pais riba podium mundial. E ehempel cu Bucuti & Tara Beach Resort ta duna ta cla; por logra cosnan grandi si nos traha cu pasion, integridad y amor pa nos pais.
Minister Cicilia tambe a resalta e modelo di gerencia di resort. E manera cu Bucuti ta trata su empleadonan, cu beneficionan y sistema di bonus regla, y reconocemento, ta testimonio cu nan ta compronde cu un empresa fuerte ta basa riba un ekipo feliz y motiva y Gobierno ta felicita gerencia pa cu esey.
