Premier Mike Eman durante conmemoracion di Dodenherdenking  “No ta arma ta protehe nos, sino e virtudnan cu nos ta comparti”

Diadomingo atardi prome cu bahada di solo  durante un ceremonia solem, Premier di Aruba, mr. Mike Eman, a honra e persona cu a cay den guerra y durante misionnan di paz. Den un discurso personal y conmovedor, e a yama pa un renovacion di union y pa pone e balornan humano universal na centro como respuesta na e menasanan di e temponan aki.

“No ta arma ta protehe nos” Premier Eman a remarca, “sino e virtudnan cu nos ta comparti: fe, speransa y amor.”

Den su discurso, Eman a para na sufrimento di e pueblo Hudiu, cu un recuerdo personal di su mama y un amiga stima di famia: Señora Engels, miho conoci como Tante Jet – un sobreviviente di e Holocausto. “Na su brasa tabatin un number, cu a trata di kita su humanidad. Pero e tabata bal hopi mas cu esey. E tabata yen di amor, balente y entrega su bida cu gratitud.”

Na nomber di gobierno di Aruba, Premier Eman a expresa su gran gratitud pa tur esnan cu a lucha pa libertad di Aruba y Reino Hulandes. Specialmente na famia di heroe di resistencia Boy Ecury, y na representante di Camarada Aruba  y Schutterij Arubano.

Eman tambe a dirigi palabra directamente na e generacion hoben:

“Boso ta e guardianan di mañan. No laga cinismo of indiferencia pone boso curason bira duro. Keda cordial cu otro a pesar di circunstacia dificil. Boso ta carga e luz aden. No solamente den palabra, pero den accion.”

E discurso a culmina cu un yamada fuerte pa renobacion moral:

“Laga nos scoge atrobe pa bon. Pa loke ta haci nos humano. Pa e forsa di amor bin riba miedo – y pa e confiansa cu nos hunto por traha un miho mundo.”