Parlamentario Dangui Oduber : Minister Cecilia kier kita hunta di supervision di AAA NV sin motibo y sin hustificacion!

Gabinete Wever Croes 1 y 2 a traha hopi duro pa percura pa traha riba un ley di integridad y corporate good governance. Tin masha hopi iniciativanan a ser tuma pa percura pa no tin metemento politico den companianan estatal y mantene e distancia necesario conforme reglanan di corporate good governance.
Na e momentonan aki, AAA NV tin un hunta di Comisario cu ta cumpli cu e profielschets y cu semper a funciona manera debe ser. Ta personanan capacita, cu experiencia, cu conocemento y cu a percura pa supervisa y controla e maneho di aeropuerto manera debe ser.

Loke sigur nos NO a spera ta cu minister Cecilia un di su promer decisionan tawata pa dobla pa Schiphol Group, humiyando y menospreciando nos propio profesionalnan pa e funcionan di CEO di nos aeropuerto y su di dos decision lo ta pa kita tur e miembronan di hunta di supervision di nos aeropuerto.
Nos a keda babuca y sorprendi pa e decision di minister Cecilia pa sin motibo alguno, sin argumento, sin hustificacion retira henter e hunta di supervision di aeropuerto.
Durante e periodo di e gobernacion AVP sin Futuro minister Cecilia representando e accionista a tene solamente 1 reunion cu e hunta di Comisario di AAA NV.
Pa por retira un hunta di supervision, e shareholder mester por motiva kiko ta e motibonan pa kiko mester retira e hunta di supervision actual di AAA NV. Y mester por usa argumentonan valido pa hustifica e retironan.
E actuacion di minister Cecilia ta uno descabeya, sin hustificacion y contra tur reglanan di corporate good governance cual sigur nos ta lamenta cu un minister nobo cu e priminti un politica distinto y diferente ta practica e mesun politica biew di AVP pa kita y persigui hende!
Nos sa cu e ta cla pa entrega tur cos na Schiphol y cu e board actual semper a para Fuerte pa nos propio localnan. Semper e board actual a kere cu nos profesionalnan local mester por maneha nos aeropuerto.
Contrario na esaki tanto promer minister Eman como tambe minister Cecilia NO ta kere cu na Aruba mes nos tin profesionalnan cu por maneha nos aeropuerto. Di e forma aki nan ta falta respet pa nos propio hendenan y asina menospreciando nos propio capacidad.
Henter anja 2024 nos loclanan a maneha nos aeropuerto, sin Schiphol y a resulta di ta e nos mihor anja den historia y asina demostrando cu nos mes POR!
Si ta berdad cu minister Cecilia kier kita e hunta di supervision di AAA NV sin hustifacion, nos lo sa di denuncia esaki tur caminda pasobra minister Cecilia mester por sa mihor cu e tin cu tene su mes na reglanan di corporate good governance!