Prome Minister Mike Eman di bishita oficial na Hulanda pa fortifica relacion den Reino

Diabierna, Prome Minister di Aruba, Mr. Mike Eman, hunto cu un delegacion a sali rumbo pa
Hulanda, caminda e mandatario lo ta parti di un serie di reunion cu mandatario- y politiconan
Hulandes pa reforsa e lasonan di cooperacion entre e paisnan den Reino.
Dialuna, Prome Minister Eman a reuni cu Karsten Klein, miembro di partido politico Hulandes
CDA, den marco di e eleccion proximo pa Tweede Kamer. Durante e bishita, Prome Minister a
expresa su gratitud pa Sr. Klein pa logra organisa un encuentro cu un agenda cu ta refleha e
prioridadnan di Premier Eman.
E amistad entre Prome Minister Eman y Sr. Klein no ta di awo sino di basta tempo, y ambos ta
comparti e mesun vision y pensamento riba con por fortalece e relacion den Reino, enfocando
riba oportunidadnan “win-win” pa tanto Hulanda como Aruba. E posicion prominente di Sr.
Klein riba lista di CDA y su posibel posicion den Tweede Kamer lo duna mas impulso pa e
vision comparti aki haya e atencion necesario den esfera politico Hulandes.
Sr. Klein a gradici Prome Minister Eman pa a acepta su invitacion pa e encuentro y ta
compromete pa sigura cu e vision aki, si e keda eligi den Tweede Kamer, lo haya su luga den e
agenda politico Hulandes.