Acto di firmamento pa lanta Fundacion Revitalization Bernhardstraat

Diasabra merdia, Prome Minister mr. Mike Eman, hunto cu Chris James di Ministerio di
Asunto General a bishita Chocolate City Restaurant na San Nicolas pa presencia e acto
di firmamento pa lanta Fundacion Revitalization Bernhardstraat. 
Durante e acto di firmamento, Sra. Inky Richardson, Sr. John Hassell y Sr. Castello
Lispier a firma oficialmente e akta pa funda e fundacion aki cu tin e tarea pa revitalisa e
caya di Bernhardstraat y duna esaki un facelift completo.
Intencion di esaki ta pa restaura e csnan den Bernhardstraat y trece nan bek den nan
structura mas original posibel y lo cubri e casnan entre e Watertoren te na e crusada di
Lagoweg. Lo restaura e casnan aki den e estilo pittoresque y colornan vibrante di
Caribe cu ta representa e calor autentico di e comunidad di San Nicolas. 
Prome Minister Eman a indica cu como Gobierno, lo duna empuhe na e fundacion aki
pa mira con por pone nan den contacto cu e habitantenan di cada cas y cu sosten di
sector priva, lo embeyece e casnan aki. Ademas Gobierno lo revitalisa e infrastructura
den e caya, manera e trottoir y vegetacion den parti di e caya pa haci esaki mas
atractivo y contribui asina cu e meta di e fundacion Revitalization Bernhardastraat.
Chris James di Ministerio di Asunto General, a indica cu despues di algun tempo ta
bishitando e habitantenan di Bernhardstraat hunto cu Prome Minister, ta sumamente
contento cu e fundacion Revitalization Bernhardstraat porfin a bira realidad. Mirando e
cantidad enorme di personanan cu ta core den e caya aki pa bay Baby y Rodger’s
Beach y e area pariba, ta importante pa duna e caya un facelift y duna cada bishitante
un toke di e calor di San Nicolas.
E revitalisacion di Bernhardtraat ta apenas e comienso y den futuro cercano lo expande
e trabaonan di revitalisacion pa otro cayanan . San Nicolas tin hopi pa ofrece y
Gabinete AVP-Futuro, lo yuda engrandece e area aki. Hunto cu e sector di arte,
gastronomia autentico, arkitectura vibrante, beachnan bunita y desaroyo tumando luga,
lo haci San Nicolas un centro turistico cu un historia profundo.