La Cabana ta celebra bienestar y progreso durante encuentro di segundo kwartaal
EAGLE BEACH – La Cabana Beach Resort & Casino presenta nan encuentro general cu empleadonan pa loke ta celebracion di segundo kwartaal bao di e tema inspirativo ‘Bibando un bida saludabel.’ Esaki a tuma luga den e hotel su ballroom. Un evento cu a trece tur empleado hunto pa un atardi di salud, empoderamento, y celebracion.
E encuentro a habri c’un bon bini caluroso hunto cu un yamado pa accion, enfatisando e importancia di activacionnan y tambe modelo HEART pa loke ta su servicionan. E modelo HEART ta un acronimo na Ingles cu ta describi scucha, empatia, disculpa, responde y resolve, gradicimento, y tambe ta un guia di servicio pa bishitante den un forma holistico – fisicamente, mentalmente, y tambe financieramente.
Rene Wild a guia e sesion riba ‘physical wellness’, motivando e empleadonan pa nan move, hala rosea, y trece mas energia pa nan curpa. E tambe a lansa loke ta un Weight Loss Challenge 2025 invitando e empleadonan pa join esaki pa siña biba un bida mas saludabel.
Centro di Desaroyo Humano a sigui c’un presentacion riba salud mental, subrayando e recursonan cu La Cabana Beach Resort & Casino ta ofrece pa sostene bienestar emocional. Nan mensahe ta riba enfatisa cu bo mester cuida bo mente pasobra e ta mesun importante cu cuido di bo curpa. Plan di Bida a guia e empleadonan riba aspectonan financiero, ofreciendo herment practico y conseho pa yuda nan tuma decisionnan informa pa un futuro sigura.
Junior Learning & Development Manager, Henry Diaz a presenta un discurso hopi poderoso riba loke ta e modelo HEART y La Cabana su cultura di servicio. Sudi Guda, Human Relations Manager a recorda tur hende cu ‘Nos ta Celebra Abo’ ta hopi mas cu djis un slogan bunita – e ta un cultura completo. Tur promocion, cumpleaños, como tambe iniciativanan ta reconoci y aprecia. E aña aki so e resort a celebra 16 promocion y transfers, cada uno representando un storia di ambicion, crecemento personal y oportunidad.
Sudi ta enfatisa cu e compromiso di e hotel ta keda den celebra su hendenan, bisando cu: ‘Nos ta mira boso. Nos ta balora boso, y nos ta celebra boso.”
General Manager, Joe Najjar a comparti algun updates hopi positivo tambe riba loke ta renobacionnan andando anto a introduci Lillian Britten como La Cabana su Assistant General Manager – un adicion fuerte den e team di liderazgo. E evento a conclui cu un mensahe di orguyo, for di fisico pa mental, financiero pa cultural – e encuentro aki tabata un celebracion di cada parti di e identificacion di e resort aki, stimulando un aprecio grandi pa miembronan di comunidad.
