MEP A ENTREGA MOCION PA INSTRUI MINISTER DI FINANSAS PA PERCURA CU AUMENTO DI SUELDO MINIMO NO CONDUCI NA AUMENTO DI COSTO DI BIDA
ORANJESTAD – Dialuna ultimo, durante un reunion den Parlamento, Fraccion di MEP a entrega un mocion pa loke ta trata e aumento di sueldo minimo pa trahadonan. Fraccion di MEP ta considera e aumento aki un paso necesario pa husticia social y pa combati pobresa. E proposicion aki ta conta cu sosten amplio, aunke cu tin preocupacion pa cu esaki tambe, especificamente cu e extra gasto salarial por conduci na un aumento den prijs di productonan. Esaki ta un factor grandi specialmente pa e empresarionan chikito, cu lo bay hayanan ta subi nan prijsnan pa por cubri e extra gasto aki, causando asina un perdida den e poder di compra pa e consumidor.
Cu e mocion aki, fraccion di MEP ta instrui e Minister di Financiën, pa tene dialogo cu empresarionan y organisacionnan di trahadornan. Lo ta bon pa traha un pakete compensatorio pa asina duna sosten na e empresanan chikito evitando asina cu e consumidornan lo wordo afecta.
Un posibel medida compensatorio ta subsidionan dirigi, por ehempel subsidio temporal pa gasto di salario pa empresa chikito, of ayudo pa sectornan cu ta depende hopi di trabou intensivo (por ehempel horeca, comercio chikito). Tambe subsidionan pa innovacion y productividad (digitalisacion, sostenibilidad, entrenamento).
Otro sugerencia pa medida di sosten adicional ta entrenamento y formacion financia pa gobierno pa aumenta productividad. Fraccion di MEP ta sugeri tambe pa busca mas cooperacion cu sector priva pa cumpra hunto y haña bentaha di escala. Principalmente un paso importante ta monitoreo di prijs pa evita subida di prijs exagera pa consumidor.
Pa fraccion di MEP, aumento di sueldo minimo mester wordo implementa den un forma husto y sostenibel. Cu subsidionan dirigi y medida di apoyo adicional, nos ta proteha empresa chikito y conserva poder di cumpra di e consumidor.
