Minister Wendrick Cicilia a presenta nota di cambio pa coregi inhusticia den e ley di ‘minimumuurloon’
Oranjestad- Minister di Turismo, Transporte y Labor mr. Wendrick Cicilia, tabata awe den Parlamento pa debati y trata e ley di ‘minimumuurloon’ cu na final di anochi a pasa unanimamente. Durante e tratamento importante aki, Minister Wendrick Cicilia a introduci un nota di cambio cu e meta pa garantisa husticia y igualdad cerca tur trahado.
E ahustacion aki ta busca pa kita e discrepancia di salario minimo pa ora pa trabou di ‘huishouden’ haci pa trahado cu no ta bibando na e cas. Den cuadro di e cambio di e ley aki awe, locual ta e discrepancia di salario minimo pa ora pa trabou domestico (uitwonend) haci tambe mester adaptacion pa duna e grupo di trahado aki e trato igual. Lo paga e grupo aki tambe e salario minimo pa ora di awg.11,58.
Di e manera aki ta garantisa cu tur e empleadonan domestico – inwonende dienstbode (trahado domestico interno) y uitwonende dienstbode (trahado domestico externo)- ta ricibi un trato husto y condicionnan igual relaciona e aplicacion di salario minimo pa ora.
“Trabou domestico ta digno y esencial pa nos sociedad. No ta posibel pa existi un distincion inhusto entre esnan cu ta biba den e hogar di nan doño di trabou y esnan cu no. Cu e nota di cambio aki, nos ta avansa den direccion di un ley laboral mas husto, transparente y humano”, tabata expresion di Minister Wendrick Cicilia.
E introduccion di e nota di cambio ta representa un paso firme den e vision di Gabinete AVP-Futuro pa fortalece e derechonan laboral y promove igualdad di oportunidadnan pa tur e trahadonan di nos isla.
1 di september 2025
