Post Tango a presenta nan “Ladderwagen” nobo

Diabierna mainta, Minister di Husticia mr. drs. Arthur Dowers a haci un bishita di trabao na Post Tango, cu ta e post principal di Brandweer situa na Tanki Flip.

Aki Minister Dowers a topa cu e comandante di Brandweer Sr. de Haas y a haya un recorido den e facilidadnan di di e departamento vital aki. E mandatario di Husticia a haya un presentacion detaya di e central di yamadanan di 911 cu ta atende casonan di emergencia pa tanto Brandweer como servicio di Ambulance.

Despues di e recorido aki, a tuma luga un ceremonia special caminda cu den presencia di invitadonan, e mandatario di husticia a haci entrega di e certificado di “Bediener Autoladder AL-01 na 7 bombero cu ta na warda. Un total di 30 bombero a completa e curso como bediener di autoladder y a ricibi nan certificado.

Unabes cu a haci entrega di e certificadonan, Minister di Husticia a yama central di Brandweer y meld cu mester e ladderwagen nobo. Den apenas algun seconde e ladderwagen a yega bao sirena y a duna un demostracion na e invitadonan presente.

E ladderwagen a yega algun luna atras, pero mester a keda modifica pa nos clima, mirando cu e truck ta fabrica na Europa. Despues di algun reto tecnico chikito, awe a ladderwagen ta operacional y cla pa cualkier eventualidad. E truck aki no solamente ta ideal pa combati candela for di un punto mas eleva, pero tambe pa yuda evacua personanan cu por baha via e trapi y drumi riba un brancard.