Trabao na rotonde simbolico di e plan nacional di reforestacion ta sigui cu sosten di ZARA

Cu un compromiso y colaboracion publico-priva, e trabaonan di renobacion ta continua na e rotonde cerca di e edificio historico na Zoutmanstraat #1 , cual tambe ta den mantencion. Dia 14 di juli, a tuma luga e lansamento oficial di Programa Nacional di Reforestacion di Aruba, cu presencia di Prome Minister mr. Mike Eman, cu ta encarga tambe cu Naturalesa y Cultura.

E rotonde aki a haya un nificacion simbolico despues di e lansamento, como e sitio unda a anuncia e plan ambicioso pa planta 100.000 mata den un periodo di cuater aña, reparti tur rond di Aruba y ta inclui skolnan y barionan.

Loke ta haci e evento mas special ta cu e tienda di moda ZARA, a adopta e rotonde y ta cuida e matanan cu a planta. Grupo Bennu (ZARA), den colaboracion estrecho cu gobierno, a inicia cu e proyecto simbolico aki.

Prome Minister Eman a expresa su alegria durante lansamento di e programa di reforestacion: “E mata cu nos a planta ey no ta simplemente un mata. E ta e inicio di un movecion. Ta impresionante pa mira con e comunidad ta sostene e vision aki y ta contribui activamente na un Aruba mas berde, mas bunita y yen di speransa.”

Francielle Lacle, un experto den conservacion di naturalesa y cu ta involucra den e ehecucion di e programa aki, tambe a expresa su aprecio. “Nos ta den e momento exacto pa tuma accion. E meta di 100.000 mata ta ambicioso, pero cu sosten di nos comunidad y socionan manera ZARA, nos por logra esey. E rotonde aki ta simbolisa con colaboracion por fortifica nos paisahe y tambe nos resistencia.”

E Programa Nacional di Reforestacion ta parti di un plan y estudio mas amplio cu Prome Minister Eman a anuncia recientemente hunto cu Universidad di Wageningen: “Aruba 2050, A Nature Inclusive Vision”. Eman a lansa tambe un iniciativa social mas amplio cu participacion di mas cu 27 organisacion local y iniciativa for di sector publico y priva.

E trabao na e rotonde ta mustra claramente con maneho gubernamental, comunidad y companianan, por traha hunto pa un Aruba cu ta resistente pa futuro, agradabel pa biba y den cual respet pa naturalesa y comunidad ta profundamente hancra.