PPA: Transparencia riba e Rijkswet ta esencial pa pueblo di Aruba

Siman pasa diabierna a tuma lugar un reunion crucial den Parlamento tocante e Rijkswet, un tema cu tin gran impacto pa Aruba completo. P’esey mes lider di fraccion di PPA, Otmar Oduber, a pidi pa e reunion aki ta uno habri pa pueblo, mediante un carta haci cu e peticion na gobierno, pero lamentablemente e trio di minister Geoffrey Wever, Gerlien Croes y Mike Eman a opta pa hacie porta sera. Esaki sigur tabata un decepcion, considerando cu e ley aki ta origina for di 10 aña pasa, esta LAFT, cu tabata den discusion y cu pueblo tin derecho pa sa kico ta pasa den nomber di su pais. E duo di AVP-FUTURO ta keda hinca Aruba den e negociacionnan scondi unda cu e ambtenaarnan cu ta negoshando ta haciendo un tremendo trabou, pero ta keda falta transparencia of dialogo cu parlamento, gremio, sindicato y comunidad completo tocante e contenido concreto.

Concepto di ley ta keda secrecia

“Mi tin cu duna reconocimento, ya cu e reunion su contenido tabata uno hopi halto, unda cu e team negociador di ambtenaar, a presenta den linea grandi y e ideanan cu nan a negosha cu Hulanda”, Oduber a subraya. Segun Otmar, tur e informacion cu nan a ricibi riba e contenido tecnico, a duna nan como parlamentario espacio pa haci pregunta hopi mas dirigi y concreto. Oduber ta elogia e trabou inmenso haci pa e team di ambtenaar, sinembargo ta keda cu e sentimento mixto, cu tanten uno no tin e concepto den man, ta djis e ideanan cu nan a presenta y e linea grandi tocante con e negociacion a bay, bo tin como conocemento. Pero den e mesun rosea, Oduber a indica cu despues di e reunion aki, e ta di acuerdo cu linea grandi presenta.

“The devil is in the detail”

Otmar tabata hopi skerpi den e reunion y dado momento el a expresa su preocupacion si: ‘The devil is in the detail’. El a sinti cu Parlamento completo a bay di acuerdo cu e preocupacion aki. Incluso el a wak un cambio den comprension, unda cu anteriormente tabatin fraccion cu tabata hopi pro pa Hulanda, pero awor parce cu ‘kwartje a cay’ y nan ta compronde cu Parlamento mester ta sigur di loke ta bay firma cu Hulanda y no por djis confia ciegamente den Hulanda pa loke ta netamente detayenan, paso eseynan no a bin dilanti ainda. “Tin hopi material cu nos mester haya den concepto, manera checklist di e condicionnan, con ta sali for di dje, etc., y esey nos ta interesa pa sa di dje mas,” Oduber a expresa.  

Silencio total di FUTURO

“A presenta e framework, e ideanan unda kier bay, pero e esencia nos no por a discuti politicamente riba dje. For di Minister President mes mi no a scucha mucho y ni papia mes di e fraccion di FUTURO, cu no tabatin ni reacciona mes. Tabata reina un silencio total”, Oduber a sigui elabora. Segun e parlamentario Oduber, el por a conclui cu for e poco cu Minister President a presenta, e tin su pensamento y e ta compronde e luchanan cu nos a hiba pa yega na nos autonomia. Particularmente cu ta su mesun antepasadonan tabata parti crucial di e lucha aki. “Mi ta sinti cu nos Minister President tin tur esaki bon presente, pero di otro banda mi ta sinti cu hopi facil e por bay tambe pa bay di acuerdo, djis pa haya un fondo di inversion of con por logra bay na ‘amen’ di Hulanda, djis haya un mihor deal cu ta posibel. Pero e pregunta ta keda: a costo di kico?”, Otmar a expresa.

Rol di Parlamento

Fraccion di PPA ta keda para riba cu como parlamentario e tin su dudanan, ya cu realidad ta cu gobierno mester haci e parti di ehecucion, ya cu esey ta nan rol. Pero e rol di Parlamento ta crucial den henter e proceso di Rijkswet aki y su rol ta uno di vigila, controla y percura pa nos como Parlamentario cuida loke ta autonomia di Aruba y e derechonan di constitucion cu ta poni estado di Hulandes, cu nos ta biba den dje