Prome Minister Mike Eman: Hulanda y Aruba ta cera acuerdo importante pa stimula inversion comercial

Diaranson mainta, a tuma luga un reunion importante den Sala di Conseho di Minister, na unda Prome Minister Mike Eman, Minister di Relacionnan di Reino Gerlien Croes y Minister di Finansas Geoffrey Wever, a reuni cu Secretario di Estado Eddie van Marum.

E bishita aki pa Gobierno, a habri e dialogo relaciona cu e negosacion riba e tema di Rijkswet, cu ya a mira avansenan significativo y Prome Minister ta optimista cu den e siguiente dianan lo yega na un texto final, pa manda esaki Rijksministerraad pa despues inicia e caminda pa por keda concretisa. Apesar di e division y tardansa relaciona cu e tema di Rijkswet cu a topa na momento di a tuma e responsabilidad pa Goberna, awe ta haciendo progreso hopi grandi y ta trece trankilidad den e dialogo y ta consolida e acuerdo aki. Den e espirito aki, ta mira e cambio di direccion, di inversion cu ambos pais ta haciendo den un miho relacion.

Awe a firma e acuerdo di Middel en Klein Bedrijf (MKB), Prome Minister ta remarca cu esaki ta prome den historia. E acuerdo aki ta encera cu Hulanda pa medio di Borgstelling MKB-kredieten Aruba, Curacao y Sint Maarten (BMKB ACS), por para garantia pa yuda empresanan chikito y mediano na momento cu e empresanan chikito y mediano tin reto pa haya financiamento pa desaroya nan empresa. E acuerdo aki ta historico mirando cu e fondonan di MKB ta destina pa empresanan Hulandes, y awo Aruba, Corsow y Sint Maarten tambe por haci uzo di esaki. Esaki kiermen cu companianan local, por aplica pa e garantia di e MKB Fonds y ta duna e companianan local oportunidad pa por desaroya nan plan di negoshi.

E acuerdo aki ta simbolisa e relacion estrecho cu Hulanda y ta habri e portanan pa trata otro temanan manera di e fondo di inversion, cu pa Prome Minister Eman ta di sumo importancia. Tipo di desaroyonan asina ta habri porta poco poco pa e pensamento cu inversionnan ta importante, specialmente pa Small Island Development States manera Aruba.

Como muestra di e importancia di inversion sostenibel, awe atardi na Archivo Nacional, Prome Minister Eman lo presenta e proyecto di renobacion y transformacion di e tankinan di awa na Kibaima den e facilidad moderno pa Archivo Nacional. Na mes momento, Secretario di Estado van Marum lo entrega Prome Minister Eman un “beschikking” den cual Hulanda ta haci e compromiso pa financia entre otro e proyecto importante aki.

Pa medio di e acuerdonan aki, Aruba y Hulanda ta fortifica e lasonan pa garantisa progreso, unidad y desaroyo sostenibel.